اقتوبەدە اشىق اسپان استىندا دەنە شىنىقتىرۋعا ارنالعان سپورت الاڭدارى اشىلدى - فوتو

استانا. قازاقپارات - بۇگىن قازاقستان رەسپۋبليكاسىنىڭ ۇلتتىق وليمپيادالىق كوميتەتى اقتوبە قالاسىندا اشىق اسپان استىندا دەنە شىنىقتىرۋعا ارنالعان سپورت الاڭدارىن اشتى.

وسىلايشا، وبلىس ورتالىعىندا ءتورت street workout ايماعى جۇمىس ىستەيدى.

بۇل تۋرالى ەلىمىزدىڭ ۇلتتىق وليمپيادالىق كوميتەتىنىڭ باسپا ءسوز قىزمەتى حابارلايدى.

سپورتتىق الاڭداردىڭ جالپى اۋماعى 1 500 شارشى مەتردەن اسادى. ءاربىر الاڭ 20 دان استام سپورتتىق قۇرال- جابدىقپەن قامتاماسىز ەتىلگەن. ءداستۇرلى كەرمە، قوسسىرىق سياقتى سناريادتاردان وزگە street workout سپورتىنا ءتان ءتۇرلى قۇرالدار ورناتىلعان.

سپورتتىق الاڭدار قالانىڭ ۆوكزالى، ونەركاسىپتىك اۋداندارىندا ورنالاسقان. ەڭ ۇلكەنى - اقتوبە تۇرعىندارى كوپتەپ جينالاتىن Mega-Aktobe ورتالىعىنىڭ ماڭىنان اشىلدى.

قازاقستان رەسپۋبليكاسى ۇلتتىق وليمپيادالىق كوميتەتى ەلىمىزدىڭ كوپتەگەن ايماقتارىندا وسىنداي سپورت الاڭدارىن اشۋدى جوسپارلاپ وتىر. ماسەلەن، ەكى كۇننەن كەيىن، 29 -شىلدەدە شىمكەنت قالاسىندا street workout الاڭدارى اشىلادى. سپورتتىق الاڭداردى اشۋعا قازاقستان رەسپۋبليكاسى ۇلتتىق وليمپيادالىق كوميتەتىنىڭ پرەزيدەنتى تيمۋر قۇلىبايەۆ مۇرىندىق بولىپ، قۇرىلىس جۇمىستارىن تولىقتاي ءوزىنىڭ جەكە قاراجاتىنان قارجىلاندىردى.

اشىق اسپان استىنداعى سپورتتىق الاڭدار ءتۇرلى جاستاعى ادامدارعا سالاۋاتتى ءومىر سالتىن ۇستانىپ، سپورتپەن اينالىسۋىنا جاقسى نەگىز بولا الاتىنىن كورسەتتى. ەستەرىڭىزگە سالا كەتەيىك، ماۋسىم ايىنىڭ باسىندا ق ر ۇ و ك استانا قالاسىندا وسىنداي ەكى الاڭ اشقان بولاتىن. Street workout فەدەراتسياسىنىڭ مالىمەتىنە سۇيەنسەك، قازىرگى كەزدە ەلىمىزدە 70000 قازاقستاندىق وسى سپورت تۇرىمەن شۇعىلدانادى.






اۆتور: كۇنسۇلتان وتارباي