ەرەۆانداعى اتىستىڭ جاي- جاپسارى بەلگىلى بولدى - فوتو
ناتيجەسىندە ءبىر پوليتسيا قىزمەتكەرى جانە راديكالدى توپتىڭ بىرنەشە مۇشەسى جانە ونىڭ كوشباسشىسى پاۆەل مانۋكيان جاراقات الدى.
پوليتسيانىڭ قوعاممەن بايلانىس باسقارماسىنىڭ باسشىسى اشوت اگارونياننىڭ حابارلاۋىنشا، 27 -شىلدەگە قاراعان ءتۇنى قارۋلى توپتىڭ ەكى مۇشەسى - گاگيك ەگيازاريان مەن ارام اكوپيان بيلىككە ءوز ەرىكتەرىمەن بەرىلدى.
جارالانعاندار «ەرەبۋني» مەديتسينالىق ورتالىعىنا جەتكىزىلىپ، قاجەتتى كومەك كورسەتىلدى.
«تۇنگى ساعات بىردە «ەرەبۋني» مەديتسينالىق ورتالىعىنا ءۇش جارالى ادام ءتۇستى. ونىڭ ءبىرى پوليتسيا قىزمەتكەرى. ونىڭ وق تيگەن اياعىنا دارىگەرلەر وتا جاسادى. ءقازىر جاعدايى تۇراقتى. وزگە جارالانۋشىلار - پاۆەل مانۋكيان جانە ونىڭ ۇلى ارام مانۋكيانعا دا وتا جاسالىپ، جانساقتاۋ بولىمىنە اۋىستىرىلدى» ، - دەپ حابارلادى جەرگىلىكتى ب ا ق «ەرەبۋني» مو ديرەكتورى ميكاەل مانۋكيانعا سىلتەمە جاساپ.
ايتا كەتەيىك، وتكەن ءتۇنى ورىن العان وقيعا راديكالدى قارۋلى توپ مۇشەلەرى مەن قۇقىق قورعاۋ ورگاندارى قىزمەتكەرلەرى اراسىنداعى ءبىرىنشى اتىس ەمەس.
26 -شىلدەگە قاراعان ءتۇنى «ساسنا سرەر» توپ مۇشەلەرى اۆتوكولىكپەن پوليتسيا كۇزەت جاساعىنا جاقىنداعىسى كەلىپ، پوليتسيا قىزمەتكەرلەرىمەن اتىس-شابىس وتكىزدى. وندا راديكالدى توپ مۇشەلەرى - اشوت پەتروسيان مەن وۆاننەس ارۋتيۋنيان جاراقات الىپ، بيلىك ولاردى «ەرەبۋني» مەدورتالىعىنا جەتكىزدى.
پوليتسيا مالىمەتىنشە، قازىرگى ۋاقىتتا ولار تۇتقىندارعا ارنالعان اۋرۋحاناعا اۋىستىرىلدى. ولارعا زاڭسىز قارۋدى ساقتاۋ جانە تاسىمالداۋ، توپ بولىپ عيماراتتى باسىپ الۋ بويىنشا ايىپ تاعىلدى.
ەسكە سالا كەتەيىك، 17 -شىلدە كۇنى «ساسنا سرەر» راديكالدى توبىنىڭ مۇشەلەرى ەرەۆان قالاسى ەرەبۋني اۋدانىنداعى كۇزەت پولكىنا باسقىنشىلىق جاساپ، بىرنەشە پوليتسيا قىزمەتكەرىن كەپىلگە الدى. كەيىنىرەك، كەلىسسوزدەر ارقىلى كەپىلگە الىنعان بارلىق تۇتقىندى بوساتتى. الايدا، پوليتسيا ءبولىمى عيماراتىن ۇستاپ وتىر. قويعان تالاپتارى سول باياعى.
