اقتوبەدەگى قارۋ-جاراق دۇكەندەرىنە ايىپپۇل سالىندى

الماتى. قازاقپارات - اقتوبەدە «پاللادا» قارۋ-جاراق دۇكەنى قوجايىنىنىڭ ۇستىنەن قىلمىستىق ءىس قوزعالىپ، تەرگەۋ ءجۇرىپ جاتىر.

ودان بولەك، وسى «پاللادا» جانە «پانتەرا» دۇكەندەرىنە 20 ايلىق ەسەپتىك كورسەتكىش مولشەرىندە اكىمشىلىك ايىپپۇل سالىندى.  5 -ماۋسىم كۇنى بولعان لاڭكەستىك شابۋىلداردان كەيىن، قالاداعى بارلىق قارۋ-جاراق دۇكەنىندە كەشەندى تەكسەرۋ جۇرگىزىلگەن. پروكۋراتۋرا مەن ىشكى ىستەر دەپارتامەنتىنىڭ وكىلدەرى قارۋ-جاراقتى ساقتاۋ زاڭدىلىقتارىنىڭ ورەسكەل بۇزىلعانىن ايتادى.

اسىرەسە، «پاللادا» دۇكەنىندە ءبىرقاتار كەلەڭسىزدىكتىڭ بەتى اشىلعان. قاۋىپسىزدىك شارالارى دۇرىس قامتاماسىز ەتىلمەگەن. سۋىق قارۋ زاڭعا سايكەس ساقتالماعان. قازىر اتالعان دۇكەندەردەگى زاڭبۇزۋشىلىقتار جويىلىپ، قاتاڭ باقىلاۋعا الىندى. الايدا تەررورلىق قاۋىپتىلىكتىڭ سارى دەڭگەيىنە بايلانىستى، قارۋ-جاراق دۇكەندەرىنىڭ جۇمىسى ۋاقىتشا توقتاپ تۇر.

ماراتبەك مىرزامۇراتوۆ، وبلىستىق پروكۋراتۋرانىڭ باسقارما باسشىسى:

- پاللادانىڭ قىزمەتىنە باستاپقى 1-ايىپپۇل سالىندى. ىشكى ىستەر ورگاندارى اكىمشىلىك- وندىرىستىك ءىس قوزعاپ، ايىپپۇل سالدى. جانە وعان قاتىستى قىلمىستىق ءىس تەرگەۋ بارىسىندا ءجۇرىپ جاتىر. اتاپ وتەر بولساق، قارۋ-جاراقتىڭ قاۋىپسىزدىگىن قامتاماسىز ەتپەگەنى جونىندە ءىس قوزعالدى. ال پانتەراعا قاتىستى 2-ايىپپۇل سالىنىپ، ەكەۋى دە تولەندى.

www.24.kz