الماتىدا جاڭا كولىك جول ايرىقتارىنىڭ قۇرىلىسى باستالادى - فوتو
سونىڭ ارقاسىندا ءبىرقاتار كوشەلەردىڭ كولىك وتكىزۋ مۇمكىندىگى جاقسارادى. بۇل تۋرالى بۇگىن الماتى قالاسى اكىمىنىڭ باسپا ءسوز قىزمەتىنەن حابارلادى.
الماتى قالالىق جولاۋشىلار كولىگى مەن اۆتوموبيل جولدارى باسقارماسىنىڭ حابارلاۋىنشا، كولىك جول ايرىقتارى رىسقۇلوۆ داڭعىلى مەن ەمسوۆ كوشەسىنىڭ قيىلىسى جانە رىسقۇلوۆ داڭعىلى مەن قۇلجا ماگيسترالدىق جولىنىڭ قيىلىسىندا سالىنادى دەپ جوسپارلانۋدا.
بۇل جول قيىلىستارىنداعى كولىك قوزعالىسىن ورتا ەسەپپەن 18 پايىزعا جەڭىلدەتۋگە مۇمكىندىك بەرەدى.
سونداي-اق، فۋرمانوۆ كوشەسىن تەمىر جولداردىڭ ۇستىمەن ەستاكادا ارقىلى جانسۇگىروۆ كوشەسىنە دەيىن جەتكىزۋ كوزدەلۋدە.
ال بۇل، قالانىڭ ورتالىق بولىگىندەگى كولىك قوزعالىسىن 20 پايىزعا جەڭىلدەتۋگە مۇمكىندىك بەرەدى.
بۇدان باسقا، ءال-فارابي داڭعىلىن قايتا قۇرۋ جوباسى قالا تۇرعىندارىنىڭ تالقىلاۋىنا بەرىلدى. بۇل تۋرالى ءالى تۇبەگەيلى شەشىم قابىلدانعان جوق.
بيىل قىركۇيەك ايىندا رىسقۇلوۆ داڭعىلى مەن سايىن كوشەسىنىڭ قيىلىسىنداعى كولىك جول ايرىعىن قولدانىسقا بەرۋ جوسپارلانۋدا. بۇل وسى ۋچاسكەنىڭ كولىك وتكىزۋ مۇمكىندىگىن 15 پايىزعا ارتتىرۋعا مۇمكىندىك بەرەدى.
ال سولتۇستىك اينالما جولى مەن بوكەيحانوۆ كوشەسىنىڭ قيىلىسىندا سالىنىپ جاتقان كولىك جول ايرىعىن 2017 -جىلى جەلتوقساندا قولدانىسقا بەرۋ جوسپارلانعان. ساراپشىلاردىڭ پىكىرىنشە، بۇل كولىكتەردىڭ سولتۇستىك باعىتتاعى قوزعالىسىن 16 پايىزعا ارتتىرۋعا مۇمكىندىك بەرەدى.
ايتا كەتەلىك، بيىل تولە ءبي كوشەسى شىعىس اينالما جولىنا جالعاندى. وسى جوبانىڭ ارقاسىندا رايىمبەك داڭعىلى مەن ءسۇيىنباي، فۋرمانوۆ جانە قونايەۆ كوشەلەرىندە كولىك قوزعالىسى كەم دەگەندە 20 پايىزعا جەڭىلدەندى.
ەستەرىڭىزگە سالا كەتەلىك، الماتىدا 2001 -جىلدان بەرى جالپى 300 ميلليارد تەڭگەگە 28 كولىك جول ايرىعى سالىندى.
اۆتور: ايبوتا جاپپاربەرگەن
