استاناداعى ينجەنەردىڭ ونەرتابىسىنا امەريكا قىزىعۋشىلىق تانىتىپ وتىر

استانا. قازاقپارات - استانالىق ينجەنەردىڭ ونەرتابىسىنا ا ق ش- تا ۇلكەن تاپسىرىس بەرىلدى.

بۇل تۋرالى تەحنولوگيالىق دامۋ بويىنشا ۇلتتىق اگەنتتىكتىڭ باسپا ءسوز قىزمەتى حابارلادى.

اگەنتتىكتىڭ حابارلاۋىنشا، ەۆگەني شەرباتوۆتىڭ «مانگۋست» اتتى ونەرتابىسى Technation بايقاۋىندا جەڭىسكە جەتكەننەن كەيىن، قازاقستاندا عانا ەمەس، شەتەلدە دە ۇلكەن قىزىعۋشىلىققا يە بولدى.

«قازىرگى ۋاقىتتا سان-فرانتسيسكودان اۋتيست بالالار قاۋىمداستىعىنان ۇلكەن تاپسىرىس كەلىپ ءتۇستى. سونىمەن قاتار قازاقستاندا «قازپوشتا» ا ق وزدەرىنىڭ حاتتارىن باقىلاۋ ماقساتىندا ساتىپ الۋدى جوسپارلاۋدا. وتاندىق GPS- جۇيە ەلدە عانا ەمەس، حالىقارالىق نارىقتا دا بىرەگەي بولىپ تابىلادى»، - دەلىنگەن حابارلامادا.

كەلتىرىلگەن دەرەكتەر بويىنشا، جوبا قۇنى 18,8 ميلليون تەڭگەنى قۇرايدى. ونىڭ 90 پايىزىن اگەنتتىك قارجىلاندىرعان.

بارلىعى ەۆگەنيي شەرباتوۆتىڭ قيىن ومىرلىك جاعدايعا تاپ بولۋىنان - بالاسىنىڭ جوعالىپ كەتۋىنەن كەيىن باستالدى. سول كەزدە جوبا اۆتورى اتالمىش قۇرىلعىنى ويلاپ تابادى. سونىمەن قاتار جوبا اۆتورىنىڭ ايتۋىنشا، ترەكەردى ساتىپ الۋعا 600 گە تارتا اتا-انا تاپسىرىس بەرگەن.

«مانگۋست» ترەكەرى سىنبايدى، سۋ استىندا ىستەي بەرەدى. قۋاتى 20 كۇنگە دەيىن جەتەدى ءارى قاۋىپسىز. موبيلدى بايلانىسى بار الەمنىڭ كەز كەلگەن جەرىندە جۇمىس جاساي بەرەدى. اسا جوعارى دالدىگىمەن ەرەكشەلەنەدى. ءتىپتى ساۋدا ۇيلەرىندە، جەرتولەلەردە اسا دالدىكپەن سيگنال جىبەرە الادى. ونىڭ ۇستىنە ونى قولدانۋ وتە وڭاي جانە مۇمكىندىگى شەكتەۋلى ادامدارعا ىڭعايلى. وسى قاسيەتتەرىنىڭ ارقاسىندا ول الەمدەگى باسقا بالامالاردان وق بويى وزىق تۇر.

«باسقا ترەكەرلەردىڭ اككۋمۋلياتورلارى تەز وتىرادى، سوققى كەزىندە سىنىپ قالادى. بالالار ءۇشىن ونىڭ مىقتىلىعى ماڭىزدى، سەبەبى بالالار جۇگىرەدى، قۇلاپ قالۋى مۇمكىن. ترەكەرمەن بىرگە تولىق فۋنكتسيونالدى قوسىمشا بار، ول ترەكەردىڭ قايدا ورنالاسقاندىعىن تابۋعا مۇمكىندىك بەرەدى»، - دەپ جازادى اگەنتتىكتىڭ باسپا ءسوز قىزمەتى.

اۆتور: جاسۇلان جولدىبايەۆ