الماتىدا ءىز-ءتۇزسىز جوعالعان سافار شاكەيەۆتىڭ اناسى ۇندەۋ جاريالادى

استانا. قازاقپارات - الماتىدا ءىز-ءتۇزسىز جوعالعان سافار شاكەيەۆتى ىزدەستىرۋ ءالى جالعاسىپ جاتىر.

وعان تىكۇشاق تا جۇمىلدىرىلدى. اۋە كولىگىمەن ءتارتىپ ساقشىلارى تاۋلى ايماقتاردى تۇگەل ءسۇزىپ شىقپاق. ال تۋعان-تۋىستارى ونى بەلگىسىز بىرەۋلەر جاسىرىپ ۇستاپ وتىر دەگەن پىكىردە، دەپ حابارلادى ك ت ك تەلەارناسى.

سوعان بايلانىستى، سافاردىڭ اناسى ۇلىنىڭ جوعالۋىنا قاتىسى بولۋى مۇمكىن دەگەن ادامدارعا ۇندەۋ جاسادى.

- ۇلىمدى ۇستاپ وتىرعان بىرەۋلەر بولسا، ايتارىم، بۇكىل وتباسىمىز سىزدەرگە ەشقانداي شارا قولدانبايدى. تەك قالادا كەز كەلگەن ايالداماعا نەمەسە باسقا ءبىر جەرگە تاستاپ كەتسەڭىزدەر بولعانى. اناسى رەتىندە مەنى تۇسىنۋلەرىڭىزدى سۇرايمىن، - دەدى س. شاكەيەۆتىڭ اناسى جىبەك شاكەيەۆا

بەلگىلى كومپوزيتور ەركەش شاكەيەۆتىڭ ۇلى 25 جاستاعى سافار شاكەيەۆ وسىدان 10 كۇن بۇرىن جوعالىپ كەتكەن بولاتىن.

سوڭعى رەت تاڭعى 7:30  دا ءال-فارابي داڭعىلى مەن ەسەنتاي وزەنىنىڭ قيىلىسىندا بولعانى باقىلاۋ كامەراسىنا ءتۇسىپ قالعان. بۇگىندە قۇقىق قورعاۋ ورگاندارى قىزمەتكەرلەرىمەن بىرگە اعايىن-تۋىستارى، دوستارى جانە ەرىكتىلەر توبىنان قۇرالعان 50 ادام كۇن سايىن ىزدەستىرىپ جاتىر.

سۇڭگۋىرلەر ەسەنتاي وزەنىن ءسۇزىپ شىعىپ، ەشتەڭە تاپپاعانىن ايتتى. سوندىقتان تۋىستارى سافاردى بىرەۋلەر ۇستاپ وتىر دەگەن سەنىمدە.