تۇركيا ەردوعاننىڭ پەتەربۋرگكە باراتىنىن حابارلادى
سەيسەنبى كۇنى رەسەي مەن تۇركيانىڭ پرەمەرلەرىنىڭ ورىنباسارلارى ماسكەۋدە كەزدەستى. Reuters اگەنتتىگىنىڭ جازۋىنشا، تاراپتار جەلتوقسان ايىندا تۇرىك اسكەري-اۋە كۇشتەرىنىڭ رەسەيلىك سۋ-24 بومبالاۋشىسىنا شابۋىلىنان كەيىن سىزات تۇسكەن ەكى ەل اراسىنداعى ساۋدا جانە ەكونوميكالىق قارىم- قاتىناستى قايتا باستاۋ ماسەلەسىن تالقىلادى.
«ءبىز مۇندا 24 -قاراشاعا دەيىن بولعان جاقسى قارىم- قاتىناسىمىزدى جوعارعى دەڭگەيگە كوتەرۋگە كەلدىك»، - دەدى م. شيمشەك.
ەردوعان پۋتينگە سۋ-24 ۇشاعىمەن بولعان وقيعاعا وكىنىشىن ءبىلدىرىپ، حات جازعاننان كەيىن وكپە- رەنىشتىڭ توڭى ءجىبي باستادى. رەسەي تۇركياعا بارۋعا سالىنعان تىيىمدى الىپ تاستادى، چارتەرلىك رەيستەر قايتا اشىلدى. اۋىل شارۋاشىلىعى ءمينيسترى الەكساندر تكاچەۆ ماسكەۋدىڭ تۇركيا ازىق- تۇلىگىنە سالىنعان تىيىمدى الۋعا اسىقپايتىنىن جەتكىزدى.
دۆوركوۆيچتىڭ ايتۋىنشا، ەردوعاننىڭ حاتى مەملەكەتتەر اراسىنداعى قارىم- قاتىناستىڭ قالپىنا كەلۋىنە نەگىز بولدى. «پرەمەر-مينيستر ۇكىمەتارالىق كوميسسيانىڭ جۇمىسىن قايتا باستاۋ تۋرالى شەشىمگە قول قويدى، - دەدى پرەمەر-مينيستر ورىنباسارى. - بۇل ءبىزدىڭ العا دامۋىمىزعا مۇمكىندىك بەرەدى».
وسى تۇستا دۆوكروۆيچ مەملەكەتتەر اراسىنداعى قارىم- قاتىناس كەزەڭ- كەزەڭىمەن قالپىنا كەلۋى ءتيىس ەكەنىن اتاپ ءوتتى. كەزدەسۋدە شيمشەك توڭكەرىس جاساۋ ارەكەتى كەزىندە تۇركيانىڭ رەسمي بيلىگىن قولداعانى ءۇشىن رەسەي تاراپىنا العىس ءبىلدىردى. ونىڭ ايتۋىنشا، ماسكەۋ «دەموكراتيانى جانە تۇركيا بيلىگىن قولدادى».
وعان دۆوركوۆيچ «رەسەي قولدانىستاعى بيلىكتى قۇلاتۋعا تىرىساتىن كونستيتۋتسياعا قارسى ارەكەتتەردىڭ بولۋىنا جول بەرمەۋ پوزيتسياسىن نىق ۇستانادى»، دەپ جاۋاپ بەردى.
