تۇركيادا قازاقتىڭ ۇلتتىق بۇيىمدارى مەن تاعامدارى تانىستىرىلدى
كورمەدە تۇرىك ەلىندەگى قاراكوز قانداستارىمىزدىڭ قولىنان شىققان ەرلەر مەن ايەلدەرگە ارنالعان باس كيىم ۇلگىلەرى، بىلعارىدان تىگىلگەن زاتتار مەن كوزدىڭ جاۋىن الاتىن اشەكەيلەر كوپشىلىكتىڭ نازارىنا ۇسىنىلدى. ءتىپتى ەرەكشە قىزىعۋشىلىق بىلدىرگەن قاتىسۋشىلار ۇلتتىق كيىمدەرىمىزدى كيىپ، ەستەلىك سۋرەتكە ءتۇسىپ جاتىر.
وسمان يمپەرياسىنىڭ نەگىزىن قالاۋشى وسمان گازي بۋرسا قالاسىنا كىرىپ كەلگەندە كەلەستىڭ قوجايايلا جايلاۋىنا حان ورداسىن تىگىپتى. اراعا 7 عاسىرداي ۋاقىت سالىپ، تاريحي ماڭىزدى ورىندا ءتۇبى ءبىر تۇركىتىلدەس حالىقتارى باس قوسىپ، تۇڭعىش مارتە ۇلتتىق سپورت تۇرلەرىنىڭ فەستيۆالىن 2 كۇن بويى دۇركىرەتىپ وتكىزدى.
ايتۋلى شاراعا جەرگىلىكتى حالىقپەن بىرگە شەتەلدەن ارنايى كەلگەن قوناقتار دا بەلسەندى قاتىستى. فەستيۆالگە كەلگەن انادولى جەرىندەگى تۇركى حالىقتارىنىڭ مادەني ورتالىقتارىنا جايلاۋدا ارنايى 16 شاتىر مەن التى قاناتتى كيىز ءۇي بوي كوتەردى. ءار ءۇيدىڭ ءىشى مەن سىرتى ۇلتتىق ناقىشپەن بەزەندىرىلگەن. بىرىنەن ءبىر قالماي جايناپ، جارقىراپ تۇر. ويتكەنى بۇل اۋقىمدى ءىس-شارادا ءار حالىق ءوزىنىڭ مادەنيەتى مەن سالت-ءداستۇرىن جان-جاقتى تانىتۋعا كۇش سالۋدا.
«وسى جەردە دە ءبىزدىڭ جىگىتتەرىمىز دومبىرا شەرتىپ، قازاق كيىمدەرى شاپان، باس كيىمدەرىن تانىتىپ، قوعام شىعارعان گازەت- جۋرنالداردى تاراتىپ جاتىر. كەلگەن حالىق وتە كوپ. بىزگە قىزىعۋشىلىق تانىتۋدا. قازىر وسى جەرگە كيىز ءۇيىمىزدى تىكتىك. قازاقستانىمىزدى وسى جەرگە كەلگەن بارلىق تۇرىكتىلدەس حالىققا تانىتىپ جاتىرمىز»، - دەدى قازاق تۇرىكتەرى زەرتتەۋ جانە ءبىلىم بەرۋ قوعامىنىڭ ءتوراعاسى سەركان دينچتۇرىك.
كورمەنى تاماشالاۋعا كەلگەن كوپشىلىككە قانداستارىمىز ىستامبۇلدا جارىق كورەتىن «قازاق ەلى» جۋرنالىن تاراتىپ، قازاقستان جايلى ماڭىزدى ماعلۇماتتار بەرۋگە تىرىستى. جەرگىلىكتى حالىقتى ەلىمىزدىڭ تاريحي- مادەني ورىندارى مەن تۋريستىك ورتالىقتارى ەرەكشە قىزىقتىرىپ وتىر. ولار كورمەگە قويىلعان كوزدىڭ جاۋىن الار ۇلتتىق بۇيىمدارعا دا كوڭىل ءبولدى.
مىسالى كۇمىستەن جاسالعان زەرگەرلىك زاتتار، بىلعارىدان تىگىلگەن باس كيىمدەر مەن تۇركى حالىقتارىنىڭ تاڭبالارى بەينەلگەن بىلەكتى جيىلعان جۇرتتىڭ تاڭدانىسىن تۋعىزدى. مۇحاممەد ايدىن مەكتەپ قابىرعاسىنان بەرى كوشپەندى حالىقتاردىڭ تاريحى مەن ءومىر سالتىن زەرتتەپ كەلەدى. ول بۇگىنگى فەستيۆال اياسىندا العاش رەت قازاقتىڭ اق داستارحانىنان ءدام- اۋىز ءتيدى.
«پىسكەن ايراننىڭ دامىنە كەلەدى، ءبىراق قىشقىلداۋ ەكەن. الدە ماعان سولاي كورىندى مە؟ قىمىز جايلى كوپ ەستىدىك قوي، ءبىراق قازاقتىڭ ۇلتتىق سۋسىنىن تۇركيادا كوپ جەردە كەزدەستىرە بەرمەيسىڭ. ال بۇگىن ءساتىن سالعاندا كوپتەن بەرى قىزىعىپ جۇرگەن بۇل قىمىزدى دا ءىشىپ كوردىك. ءوز باسىما ۇنادى»، - دەدى بۋرسا قالاسىنىڭ تۇرعىنى مۇحاممەد ايدىن.
ۇلتتىق سپورت تۇرلەرىنىڭ فەستيۆالى شەڭبەرىندە ءدۇيىم جۇرت تۇركى حالىقتارىنىڭ سۇيىكتى ويىندارى كوكپار، جامبى اتۋ، اۋدارىسپاق، تەڭگە ءىلۋ مەن كۇرەس، ساداق اتۋ، توعىزقۇمالاق سىندى اقىل- وي ويىندارىن كەڭىنەن تاماشالادى. ءتىپتى ارنايى ماماندار قىزىعۋشىلىق بىلدىرگەن ادامدارعا اتقا ءمىنۋ، نىساناعا كوزدەۋدەن ارنايى ءدارىس تە بەردى.
«ءبىزدىڭ ماقساتىمىز حالىقتى ساداق اتۋعا باۋلۋ، ولاردىڭ بۇل سپورت تۇرىنە دەگەن قىزىعۋشىلىعىن ارتتىرۋ. ويتكەنى ەكى جىل بۇرىن ساناۋلى عانا ادامدارمەن باستاپ ەدىك، قازىر جۇزدەگەن كىسى ساداق اتۋمەن تۇراقتى اينالىسادى. قاتارىمىزدىڭ كوبەيگەنىن قالايمىز. مۇنداي شارالار ۇمىت بولعان كەيبىر ادەت- عۇرىپ، ءداستۇرىمىزدى قايتا جاڭعىرتۋعا، ونى ناسيحاتتاۋعا زور مۇمكىندىك بەرەدى»، - دەدى ساداق اتۋشى ەمرەبەك ارۋ.
جيىننىڭ سوڭىندا قاتىسۋشىلار جاپپاي «قارا جورعا» ءبيىن بيلەدى. ۇيىمداستىرۋشىلار ۇلتتىق سپورت فەستيۆالىن جىل سايىن وتكىزىپ، وسىلايشا حالىقتىق مەرەكەگە اينالدىرۋدى جوسپارلاپ وتىر.
