التاي بازارىندا شىعىس قازاقستان قولونەرشىلەرى جينالدى - فوتو
شىعىس قازاقستان وبلىسى تۋريستىك اقپارات ورتالىعى مۋزەي- قورىقپەن بىرىگىپ، تۇڭعىش «التاي بازارى» فەستيۆالىن ۇيىمداستىردى.
مۋزەي- قورىقتىڭ ساندىك- قولدانبالى ونەر ءبولىمىنىڭ اعا عىلىمي قىزمەتكەرى جانە شقو قولونەرشىلەرى رەسۋرستىق ورتالىعىنىڭ ۇيلەستىرۋشىسى رايسا مۇحامەدجانوۆانىڭ ايتۋىنشا، فەستيۆالگە قاتىسۋشىلار جان- جاقتان جينالعان. سەمەي، زىريانوۆ، زايسان، شەمونايحا، بورودۋليحا، كوكپەكتى، قاتون- قاراعاي، ۇلان، تارباعاتاي، ءۇرجار اۋداندارىنان جانە وزگە دە وبلىس ەلدى مەكەندەرىنەن الپىستان استام شەبەر ءوز بۇيىمدارىن اكەلگەن.
«التاي بازارىنىڭ» العاشقى كۇنى سول جاعالاۋ كەشەنىنىڭ «شەبەرلەر قالاسىندا» تەگىن شەبەرلىك ساباقتارى ءوتتى. ءداستۇرلى قولونەرگە قىزىعاتىن ءبىرشاما حالىق جينالدى. ۇلكەندەر مەن بالالار كيىز باسۋدا، قايىڭ قابىعىنان ءورىم ءورۋ، تەرى مەن بالشىقتان ءمۇسىن جاساۋ، كىلەم توقۋدا ءوز كۇشتەرى مەن قابىلەتتەرىن سىناپ كوردى. تامارا ۆلادىكينا، ۆلاديمير وسيپوۆ، ناتاليا باجەنوۆا، نۇرزيا ءتاشىموۆا، ۆلاديمير لياپۋنوۆ سىندى شەبەرلەر تابيعي ماتەريالدارمەن جۇمىس ىستەيتىن تەحنيكالارمەن تانىستىرىپ، شيكىزاتپەن جۇمىس ىستەۋدىڭ قىر- سىرىن ءتۇسىندىردى.
سەمەيدەگى «ايشا ءبيبى» مادەني ورتالىعىنىڭ جەتەكشىسى ايمان بوقپاساروۆا جانىنداعى شي توقۋ ستانوگىنا كەلۋشىلەر قاتتى قىزىقتى. جىڭىشكە شي ساباقتارىنان تۇرمىسقا قاجەتتى بىرنەشە زاتتىڭ جاسالاتىنىنا كوپشىلىك تاڭدانىسىن جاسىرا المادى. ءبىر كەزدەرى قولونەردىڭ بۇل ءتۇرى قازاق وتباسىن جوكەمەن، قالقامەن، كىلەمشەلەرمەن، ۇلكەن قازانعا ارنالعان قاقپاقپەن قامتاماسىز ەتكەن. بۇگىندە شي ستانوگى حالىققا ەكزوتيكا بولىپ كورىنەدى، دەگەنمەن، شي - تازا ەكولوگيالىق ماتەريال جانە قازىرگى كۇيۋگە قارسى قازان، تابالارمەن سالىستىرعاندا الدەقايدا ارزان.
وبلىس حالقى عانا ەمەس، شەتەلدىك قوناقتار دا «التاي بازارىنان» تاڭ-تاماشا اسەر الدى. اقش- تان كەلگەن اقپاراتتىق تۋر اگەنتتىگى كريستوفەر ستەنتون ءوز قولىمەن جاساعان بىلعارى سالپىنشاقتى ماقتانىشپەن كورسەتتى. «مۇنداي ءىس- شارالار حالىق مادەنيەتىنىڭ ەرەكشەلىكتەرىمەن، جەرگىلىكتى حالىق داستۇرىمەن كەڭىنەن تانىستىرادى. «التاي بازارى» كۇندەرى وسكەمەنگە كەلىپ، جولىم بولعان ەكەن»، - دەدى ك. ستەنگون.
«التاي بازارىنىڭ» ەكىنشى كۇنى ەتنواۋىل الاڭىندا حالىق شىعارماشىلىعى جاۋھارلارىنىڭ جارمەڭكەسى ءوتتى.
«بۇگىنگى جارمەڭكەدە ەڭ جاقسى قولونەر بۇيىمدارىن تاڭداپ الىپ، ولاردى ەكسپو-2017 كورمەسىنە قويامىز»، - دەپ اتاپ ءوتتى ر. مۇحامەدجانوۆا.
