قازاقستان افريكا ەلدەرىنە ينۆەستيسيا سالۋدان كوپ ۇتتى - ەلشى

استانا. قازاقپارات - افريكا وداعىنداعى قازاقستاننىڭ تۇراقتى وكىلى، ەلىمىزدىڭ ەفيوپياداعى ەلشىسى ەرلىك ءالي قازاقستاننىڭ افريكاعا جاساعان ينۆەستيسيالارى قانداي ناتيجەلەرگە الىپ كەلگەندىگى تۋرالى ايتىپ بەردى.

«ارينە، قازىر جاعداي باسقا، قازاقستاننىڭ ءوزى دە ينۆەستيسياعا مۇقتاج. «ولار بىزگە ينۆەستيسيا سالا المايتىن بولسا، ولارمەن ارىپتەستىك ورناتۋدىڭ قاجەت بار ما؟» دەگەن ساۋال تۋادى. بۇل سۇراقتىڭ دا قيسىنى بار. دەگەنمەن، وسى مەملەكەتتەرگە جاسالعان ءبىزدىڭ دونورلىق كومەكتەرىمىز بىزگە قارجىلىق تۇرعىدان دا، وزگە دە قىرىنان دا بولسىن كوپ قايتارىم جاسادى»، - دەپ اتاپ ءوتتى ەلشى.

ونىڭ سوزىنە قاراعاندا، ديپلوماتتار ەكونوميكالىق ماسەلەلەرمەن عانا ەمەس، مادەني بايلانىستار مەن قارىم- قاتىناستار ورناتۋعا دا ۇلكەن سەپتىگىن تيگىزىپ جاتىر.

«افريكالىق ەلدەرمەن جۇرگىزىلگەن جۇمىستاردىڭ ارقاسىندا ب ۇ ۇ- نىڭ قاۋىپسىزدىك كەڭەسىنە 2017-2018 -جىلدارداعى تۇراقتى ەمەس ۇمىتكەرلەرىن تاڭداۋ بارىسىندا ۇلكەن قولداۋ بولدى. داۋىس بەرۋ قۇپيا بولدى جانە ناقتى كىم قالاي داۋىس بەرگەنىن مەن ايتا المايمىن، الايدا افريكالىق مەملەكەتتەردىڭ 3/2 سى قازاقستانعا داۋىس بەرگەنىنە مەن سەنىمدىمىن. سەبەبى قازاقستان افريكالىق مەملەكەتتەرگە كوپ قولداۋ جاسادى، ءوزىن وسى ەلدەر ءۇشىن جاڭا ارىپتەس رەتىندە كورسەتە الدى»، - دەيدى ە. ءالي.

سونىمەن قاتار ول ينۆەستيسيالىق تۇرعىدا قازاقستان ءۇشىن قىزىقتى 4 افريكا مەملەكەتىن ەرەكشە اتاپ ءوتتى.

«ولار دامۋشى مەملەكەتتەر جانە ولار بىزدەن ينۆەستيسيالار سۇراۋدا. ءبىزدىڭ ينۆەستيسيالاردى قانداي سالالارعا باعىتتاسا بولادى؟ بۇل - تاۋ-كەن ونەركاسىبى، مەديتسينالىق سالا، اۋىل شارۋاشىلىعى جانە ءبىلىم بەرۋ. ءبىزدىڭ ويىمىزشا، وسى 3-4 باعىت بويىنشا ارىپتەستىكتى دامىتۋعا ابدەن بولادى»، - دەدى ول.

اۆتور: جاسۇلان جولدىبايەۆ