ريو وليمپياداسىنىڭ ءۇمىتى: موڭعولدان قالاپ العان قىز قانشا جەرگە بارادى؟
ءبىز وسىعان دەيىن برازيليادا وتەتىن وليمپيادادا دزيۋدودان التى قازاقستاندىق ەل نامىسىن قورعايتىنىن ايتقان بولاتىنبىز. ولاردىڭ تورتەۋى - ەر، ەكەۋى - ايەل. ەندى قىزدارىمىزعا كەزەك بەرەيىك.
ءبىرىنشى موڭعولدان قالاپ العان لەگتونەر قىزىمىز گالبادراح وتگونسەگتسەگ تۋرالى باستاساق.
بۇل سپورتشىمىز ريودا قازاق نامىسىن قورعايدى. 2015 -جىلى قازاقستان ازاماتتىعىن العان. ۇلتى - موڭعول.
ول قازاقستانعا كەلگەنگە دەيىن ايەلدەر اراسىندا 48 كيلوگرام سالماق دارەجەسىندە الەمدىك رەيتينگتە 9-ورىندا تۇرعان. ونىڭ جەرلەسى ۋرانتسەتسەگ ءمونحبات بۇل تىزىمدە 1-ورىندا ەدى. وتگونتسەگتسەگ موڭعوليا ىشكى بىرىنشىلىگىندە وتكەن بىرنەشە كەزدەسۋدە ۋرانتسەتسەگتەن جەڭىلىپ قالعان. وليمپياداعا 48 كەلى سالماق دارەجەسىندە موڭعوليانىڭ اتىنان بارۋعا ۋرانتسەتسەگتىڭ مۇمكىندىگى ارتىق بولعاندىقتان وتگونتسەگتسەگ قازاقستاننىڭ شاقىرۋىن قابىل العان. موڭعوليا دزيۋدو فەدەراتسياسى دا سپورتشىنىڭ قازاقستان اتىنان جارىستارعا قاتىسۋىنا كەلىسىمىن بەرگەن.
وتگونتسەگتسەگ قازاقستان ازاماتتىعىن العاننان كەيىن حالىقارالىق دزيۋدو فەدەراتسياسى (IJF) ونىڭ 2013-2015 -جىلدارى جيناعان ۇپايىن تۇگەل جويعان. وسىدان كەيىن ول ءبىر جىلدىڭ ىشىندە وليمپياداعا قاجەتتى ۇپايدى جيناپ، 48 كەلى سالماق دارەجەسىندە ۇزدىك 14 سپورتشىنىڭ قاتارىنا ەنۋدى باستى ماقسات ەتەدى. ءسويتىپ، 2015 -جىلدىڭ تامىزىنان باستاپ قازاقستان قۇراماسىمەن وليمپياداعا بارۋعا قاجەتتى ۇپاي جيناۋ ءۇشىن وننان استام حالىقارالىق جارىسقا قاتىسادى. ناتيجەسىندە وتگونتسەگتسەگ 48 كەلى سالماق دارەجەسى بويىنشا الەمدىك رەيتينگتە موڭعوليالىق ۋرانتسەتسەگ ءمونحبات پەن ارگەنتينالىق پاۋلا پارەتودان كەيىنگى ءۇشىنشى ورىنعا تۇراقتاپ، وليمپيادا جولداماسىنا يە بولادى.
وتگونتسەگتسەگپەن بىرگە قازاقستانعا ونىڭ جەكە باپكەرى ەنحبااتار داشجامتس تا كەلگەن. وسىعان دەيىن سپورتشى مەن باپكەرى بارلىق جارىستارعا بىرگە دايىندالىپ، بىرگە باردى.
قازاقستان دزيۋدو فەدەراتسياسىنىڭ وكىلدەرى دە ريو وليمپياداسىندا وتگونتسەگتسەگتەن مەدال كۇتەتىندەرىن ايتىپ وتىر. دزيۋدودان قازاقستان ايەلدەر قۇراماسى قازىرگە دەيىن وليمپيادا ويىندارىندا مەدال الىپ كورمەگەن. سول ولقىلىقتىڭ ورنىن بۇل سپورتشى تولتىرادى دەگەن ۇمىتتە.
گالبادراحىن وتگونتسەگتسەگ
تۋعان كۇنى/جىلى: 25.01.1992
تۋعان جەرى: ۇلان- باتىر (موڭعوليا)
سالماعى: 48 كەلى
باپكەرى: ج. سالاماتوۆ
جەتىستىكتەرى:
الەم كۋبوگىنىڭ قولا جۇلدەگەرى (2011)
الەم كۋبوگىنىڭ كۇمىس جۇلدەگەرى (2012)
ەۋروپا كۋبوگىنىڭ كۇمىس جۇلدەگەرى (2013)
گران- پري جارىسىنىڭ جەڭىمپازى (2014)
ازيا چەمپيونى (2016)
كوپتەگەن حالىقارالىق جارىستاردىڭ (گران- پري، گراند- سلەم) جەڭىمپازى جانە جۇلدەگەرى
ق ر حالىقارالىق دارەجەدەگى سپورت شەبەرى.
مىنە، موڭعوليادان قالاپ العان سپورتشىمىزدىڭ وسىنداي ءىرى جەتىستىكتەرى بار. الدا وليمپيادادا قازاقستان قورجىنىنا ءبىر مەدال سالادى دەگەن ۇمىتتەمىز.
اۆتور: كۇنسۇلتان وتارباي
