ريو-دە-جانەيرودا وليمپيادا اۋىلى اشىلدى
مۇندا 5- تامىزدا باستالاتىن الەمدىك دودادا باعىن سىناۋعا كەلگەن سپورت ساڭلاقتارى مەن ماماندار قونىستانادى. الدىڭعى لەك كەلىپ تە ۇلگەرگەن. الايدا ولاردىڭ ءبىرقاتارى وليمپيادا اۋىلىنداعى جاعدايعا كوڭىلى تولماي مۇندا ورنالاسۋدان باس تارتقان. الەمنىڭ ءار تۇپكىرىنەن كەلگەن سپورت دەلەگاتسياسىنىڭ دەمالىپ، تىنىعۋىنا ارنالعان وليمپيادا اۋىلىندا باس-اياعى 31 نىسان بار.
ويىن كەزىندە كەشەنگە 18 مىڭ قوناق قونىستانا الادى. ال ولارعا شامامەن 13 مىڭ ادام قىزمەت كورسەتپەك. مۇندا سپورت زالى، دەمالىس ايماعى، سۇلۋلىق سالونى مەن ءدىني ورتالىقتار جانە زاماناۋي ۇلگىدە جابدىقتالعان مەديتسينالىق ورتالىق پەن 5 مىڭ ادامعا ارنالعان اسحانا بار.
«مەديتسينالىق ورتالىقتىڭ جالپى كولەمى 3500 شارشى مەتردى قۇرايدى. ادەتتەگى اۋرۋحانادان ەشقانداي كەمشىلىگى جوق. تەك ءبىر عانا جەتىسپەيتىنى، حيرۋرگيالىق ءبولىم. ەگەر سپورتشىلارعا وپەراتسيا جاسايتىنداي جاعداي تۋا قالسا، اۋرۋحاناعا جونەلتەتىن بولامىز»، - دەيدى مەديتسينالىق ورتالىقتىڭ ديرەكتورى مارسەلو پاتريسيو.
«كادىمگى مەيرامحانا سىندى جۇمىس ىستەگەنىمىزبەن بىزدە ۇلتتىق فەيجوادا تاعامى ساتىلمايدى. ويتكەنى ءبىز سپورتشىلارعا ارنالعان تاعامدار ازىرلەيمىز. سوندىقتان باستى مىندەتىمىز - ولاردىڭ دەنساۋلىعىنا پايدالى ءارى ساپالى اس ۇسىنۋ»، - دەپ اتاپ ءوتتى ديەتولوگ فلاۆيا البۋكەركە.
وليمپيادا اۋىلىنىڭ جاۋاپتى شەنەۋنىكتەرى سپورتشىلاردى قابىلداۋعا تولىق دايىنبىز دەپ جاھانعا جار سالعان. ءبىراق كەلىپ جاتقانداردىڭ العاشقى لەگى بىردەن-اق جاتار ورىنعا كوڭىلدەرى تولمايتىنىن جەتكىزدى. ءتىپتى اۆستراليالىق سپورتشىلار مۇندا تۇرۋدان باس تارتتى. ولار عيماراتتاردىڭ ىشىندەگى قۇبىرلاردان سۋ اعىپ، گازدىڭ ءيىسى شىعىپ تۇرعانىن، ءارى باسپالداقتاردىڭ جارىقتاندىرۋ جۇيەسىمەن جابدىقتالماعانىن ايتىپ وتىر. جاڭا زەلانديا مەن ۇلىبريتانيا دەلەگاتسيالارى دا وسىعان ۇقساس شاعىم تۇسىرگەن. ال قيىندىقتار شەشىلگەنشە، اۆستراليا دەلەگاتسياسى جاقىن ماڭايداعى قوناقۇيگە جايعاساتىن بولادى.
«ءبىزدىڭ ويىمىزشا، وليمپيادا اۋىلى ءالى دايىن ەمەس جانە سپورتشىلار ءۇشىن قاۋىپتى. ويتكەنى مۇندا گاز جەتكىزۋ جۇيەسى قالپىنا كەلتىرىلمەگەن. ەلەكتر قۋاتىمەن قامتۋ ماسەلەسىنە قاتىستى دا وسىعان ۇقساس ماسەلە بار. سونداي-اق كارىز جۇيەسى دە قيراپ تۇر. مەن بۇعان دەيىن 4 وليمپياداعا قاتىستىم. الايدا مۇنداي جاعدايدى العاش كورۋىم»، - دەيدى اۆستراليانىڭ ۇلتتىق وليمپيادا كوميتەتىنىڭ وكىلى كيتتي چيللەر.
«ازىن-اۋلاق كەمشىلىكتەر بار. ءبىراق وعان بولا ات-توندى الا قاشۋدىڭ كەرەگى جوق دەپ ويلايمىن. جۇمىسشىلار بىتپەگەن ءىستى تەزىرەك اياقتاۋ ءۇشىن تىنباي ەڭبەك ەتۋدە. جاقىن كۇندەرى بارلىعى قالپىنا كەلىپ، قوناقتاردىڭ كوڭىلىنەن شىعادى دەپ سەنەمىن»، دەگەن پىكىرىن ءبىلدىردى اۆستريا قۇراماسىنىڭ دارىگەرى كريستوفەر وگريس.
بارعا قاناعات ەتىپ، كەلگەن جەرىنە كوڭىلى تولىپ جاتقاندار دا جوق ەمەس. ماسەلەن بەرمۋد ارالدارىنان كەلگەن سپورت دەلەگاتسياسىنىڭ وكىلى اۆستراليالىق ارىپتەستەرىنىڭ پىكىرىنە قوسىلمايدى.
«بارلىعى عاجاپ، وليمپيادا اۋىلى كەرەمەت جەرگە ورنالاسقان. كوڭىلىمىز تولادى. اينالاداعى ادامدار دا سونداي قامقور. ويىندار وتە كوڭىلدى وتەدى دەپ ويدامىن»، دەگەن پىكىردە بەرمۋد ارالدارىنان كەلگەن دەلەگاتسيا وكىلى كيەۆين پيرسون.
وليمپيادا اۋىلىنداعى شەشىمىن تاپپاعان ماسەلەلەردى تەز ارادا جويۋ ءۇشىن مىڭنان استام قۇرىلىسشى مەن تازالىققا جاۋاپتى قىزمەتكەرلەر دامىل تاپپاي جۇمىس ىستەپ جاتىر. ونىڭ سىرتىندا ريو-دە-جانەيرو قالاسى دا قىزۋ دايىندىقتا. جەكسەنبىدە شاھاردىڭ قارۋلى كۇشتەرى سوڭعى جاتتىعۋىن وتكىزدى. وليمپيادا ويىندارى كەزىندە مۇنداعى قاۋىپسىزدىكتى 80 مىڭ سارباز پەن ءتارتىپ ساقشىلارى قاس قاقپاي قاداعالايتىن بولادى.
