قىتايدا گەنەرال پارا العانى ءۇشىن ءومىر بويى تۇرمەگە كەسىلدى

استانا. قازاقپارات - قىتايدىڭ وتستاۆكاداعى گەنەرالى گو بوسيۋن اسكەري سوت ۇكىمىمەن سىبايلاس جەمقورلىق ءىسى بويىنشا ءومىر بويى تۇرمەگە وتىرۋعا كەسىلدى، دەپ حابارلادى قىتايلىق مەملەكەتتىك ب ا ق.

75 جاستاعى گەنەرال پارا الۋعا جانە قىزمەتتىك مانسابىن اسىرا پايدالانۋعا ايىپتالۋدا.

شينحۋا اقپاراتتىق اگەنتتىگىنىڭ مالىمەتتەرى بويىنشا، گو بوسيۋن گەنەرالدىق اتاعىنان ايىرىلدى جانە ونىڭ ەسەپشوتى بۇعاتتالدى.

2002-2012 -جىلدارى گو بوسيۋن ق ح ر ورتالىق اسكەري كەڭەسىنىڭ ۆيتسە-ءتوراعاسى، سونداي-اق قىتاي كوممۋنيستىك پارتياسى ساياسي بيۋروسىنىڭ مۇشەسى بولدى.

 گەنەرالدى سوتتاۋ جابىق جاعدايدا وتۋدە، ونىڭ ۇرلاعان قاراجاتتارىنىڭ مولشەرى رەسمي جاريالانعان جوق. South China Morning Post باسىلىمىنىڭ مالىمەتتەرىنشە، گو بوسيۋن 12,4 ميلليون دوللارعا جۋىق سومادا پارا العانى ءۇشىن سوتتالۋدا.

گەنەرالدىڭ ءوزى وسى جىلعى ءساۋىر ايىندا ىستەگەن قىلمىسىن مويىندادى جانە وكىنىشىن ءبىلدىردى، ءبىراق تا ۇكىمگە شاعىم بەرمەيتىنىن ايتتى.

ق ح ر ءتوراعاسى شي جينپين بيلىك باسىنا كەلگەن بويدا اۋقىمدى سىبايلاس جەمقورلىققا قارسى ناۋقاندى باستادى، ونىڭ بارىسىندا بىرنەشە ونداعان جوعارى شەندى شەنەۋنىكتەر تۇرمەگە وتىرعىزىلدى.