ءۇش مىڭعا تارتا تالاپكەر قازاقستاننىڭ اسكەري جوعارى وقۋ ورىندارىنا تۇسۋگە ىقىلاس بىلدىرۋدە

استانا. قازاقپارات - قازاقستاندىقتار ءۇشىن ەلىمىزدىڭ اسكەري جوعارى وقۋ ورىندارىنداعى جاڭا اسكەري ماماندىقتارعا وقۋعا ءتۇسۋ قولجەتىمدى بولىپ وتىر.

ونىڭ ىشىندە، بيىلعى جىلدان باستاپ قۇرلىق اسكەرلەرىنىڭ اسكەري ينستيتۋتى مەن راديوەلەكترونيكا جانە بايلانىس اسكەري- ينجەنەرلىك ينستيتۋتىندا العاش رەت «اسكەري ىستەگى لوگيستيكا»، «اسكەري ىستەگى يۋريسپرۋدەنتسيا»، «اسكەري ىستەگى راديوەلەكترونيكا مەن ينجينيرينگ» جانە «اسكەري ۇجىمنىڭ پسيحولوگياسى»، «اسكەري ىستەگى اقپاراتتىق قاۋىپسىزدىك جۇيەلەرى» ماماندىقتارى اشىلدى، دەپ حابارلادى ق ر قورعانىس مينيسترلىگىنىڭ باسپا ءسوز قىزمەتى.

اۋە قورعانىسى كۇشتەرىنىڭ اسكەري ينستيتۋتىندا دا جاڭا ماماندىقتار پايدا بولدى. مۇندا «ۇشقىشسىز ۇشۋ اپپاراتتارىن ۇشۋدا پايدالانۋ» جانە «اسكەري مەديتسينا» ماماندىقتارى اشىلدى.

ق ر ق م ءبىلىم جانە عىلىم دەپارتامەنتى وكىلدەرىنىڭ حابارلاۋىنشا، بۇگىنگى كۇنى قازاقستاننىڭ تۇكپىر- تۇكپىرىنەن قورعانىس مينيسترلىگىنىڭ اسكەري جوعارى وقۋ ورىندارى مەن كادەت كورپۋسىنا وقۋعا تۇسۋگە شامامەن 3000 بوزبالا قۇجاتتارىن تاپسىردى. ولاردىڭ بارلىعى بولىنگەن 865 ورىنعا ۇمىتتەنۋدە.

قازىرگى كەزدە بوزبالالار ىرىكتەۋدەن ءوتۋ ءۇشىن بىرتىندەپ وقۋ ورىندارىنا كەلىپ جاتىر. ىرىكتەۋ بەس كەزەڭدى قامتيدى.

«الدىن الا مەديتسينالىق كۋالاندىرۋدى ازاماتتىق جالپى ءبىلىم بەرۋ مەكتەپتەرىنىڭ بىتىرۋشىلەرى وزدەرىنىڭ اۋداندارىندا وتسە، وندا الدىن الا كاسىبي- پسيحولوگيالىق ىرىكتەۋدى، دەنە دايارلىعىن، سوڭعى مەديتسينالىق كۋالاندىرۋ مەن كاسىبي- پسيحولوگيالىق ىرىكتەۋدى ولارعا تىكەلەي وزدەرى تاڭداعان جوعارى وقۋ ورنىندا وتۋگە تۋرا كەلەدى. اسكەري ماماندىقتار ەلىمىزدە جىل سايىن ۇلكەن تانىمالدىلىققا يە بولۋدا»، - دەلىنگەن حابارلامادا.

اۆتور: قانات مامەتقازى ۇلى