الماتىدا لاڭكەستىككە قارسى وپەراتسيا بارىسىندا جاراقات العان ءتارتىپ ساقشىلارىنىڭ ءبىرى اۋرۋحانادان شىقتى - ءى ءى د - فوتو
بۇل تۋرالى بۇگىن الماتى قالالىق ءى ءى د باسپا ءسوز قىزمەتىنەن حابارلادى.
الماتى قالالىق ىشكى ىستەر دەپارتامەنتى جەرگىلىكتى پوليتسيا قىزمەتىنىڭ جول- پاترۋلدىك پوليتسيا پولكىنىڭ پوليتسيا قىزمەتكەرى مۇرات بالتابەك بۇگىن قالالىق جەدەل شۇعىل كومەك كورسەتۋ اۋرۋحاناسىنان شىقتى. ول ر. كۇلەكبايەۆتىڭ قۇقىققا قايشى ارەكەتىنە تويتارىس بەرۋ بارىسىندا يىعىنان جاراقات العان ەدى.
«ول بىزگە وڭ يىعىنان وق ءتيىپ، جاراقات الىپ، قانسىراپ، ەسەڭگىرەگەن كۇيىندە جەتكىزىلدى. سودان، دياگنوستيكالىق شارالار جانە شۇعىل وتا جاسالدى. وسىدان كەيىن ناۋقاس جانساقتاۋ بولىمىنە اۋىستىرىلدى. ءسويتىپ، ونىڭ ءحالى بىرتىندەپ تۇراقتالا باستادى. بۇگىن اۋرۋحانادان ۇيىنە شىعارىلدى. ەندى امبۋلاتوريالىق سيپاتتا ەم قابىلدايدى. تولىق ايىعىپ كەتكەنشە مۇرات بالتابەك ءبىزدىڭ باقىلاۋىمىزدا بولادى»، - دەدى الماتى قالالىق جەدەل شۇعىل كومەك كورسەتۋ اۋرۋحاناسىنىڭ باس دارىگەرى الماس بولات ۇلى.
ال، اۋرۋحانادان شىققان پوليتسيا قىزمەتكەرى ءوزىنىڭ ريزاشىلىعىن ءبىلدىردى.
«مەن ءبىرىنشى كەزەكتە قىلمىستىق ارەكەتكە تويتارىس بەرۋ بارىسىندا قازا تاپقان ارىپتەستەرىمنىڭ وتباسىنا قايعىرىپ كوڭىل ايتامىن. وسىنداي قيىن كەزدە يگى تىلەكتەرىن ءبىلدىرىپ، ماتەريالدىق كومەك كورسەتكەن وتانداستارىمىزعا شەكسىز ريزاشىلىعىمدى بىلدىرەمىن. ءى ءى د باسشىلىعىنا، ارىپتەستەرىمە جانە دارىگەرلەرگە دەر كەزىندە كورسەتكەن كومەكتەرى ءۇشىن ۇلكەن راحمەتىمدى ايتامىن.
مەن - جاس پوليتسيا قىزمەتكەرىمىن. ىشكى ىستەر سالاسىندا جۇمىس ىستەگەنىمە ءالى ءبىر جىلعا دا جەتپەگەن. ءبىراق، بۇل قاندى قىرعىن ازاماتتاردى قورعاپ، قىلمىسقا قارسى كۇرەسسەم دەگەن ىنتا-جىگەرىمدى باسا العان جوق. كەرىسىنشە مەن ەندى قالادا قۇقىقتىق ءتارتىپتى قامتاماسىز ەتۋ جانە ەلىمىزدىڭ يگىلىگى ءۇشىن جۇمىسقا شىعۋعا اسىعامىن»، - دەدى پوليتسيا قىزمەتكەرى بالتابەك.
اۆتور: ايبوتا جاپپاربەرگەن
