مينيسترلىك قازاقستانداعى «ءسىبىر جاراسىنا» قاتىستى احۋالدى ايتىپ بەردى

استانا. قازاقپارات - ق ر اۋىل شارۋاشىلىعى مينيسترلىگى «ءسىبىر جاراسى» تىركەلگەن وڭىرلەردەگى جاعداي تۋرالى ايتىپ بەردى.

«قازاقپارات» ءتىلشىسىنىڭ رەسمي ساۋالىنا قاتىستى بەرگەن جاۋابىندا مينيسترلىك جاعدايدىڭ تولىق باقىلاۋدا تۇرعاندىعىن حابارلادى.

«قاراعاندى وبلىسى ەركىندىك اۋىلىندا ەپيزووتياعا قارسى ءىرى قارا مالدى ۆاكسيناتسيالاۋ جۇمىستارى اياقتالدى. جالپى ول جەردە 1831 ءىرى قارا مال، 269 ۇساق مال، 900 باس جىلقى ەگىلگەن. 24 680 م2 جەرگە زالالسىزداندىرۋ جۇرگىزىلگەن»، - دەپ جازادى مينيسترلىك.

سونىمەن قاتار ەركىندىك اۋىلىنىڭ كىرەبەرىسىنە ەكى بلوك-بەكەت ورناتىلعان. مالدىڭ قاۋىپتى ايماقتان شىعىپ كەتپەۋى ءۇشىن اۋىل اينالاسىنا شەكارا قازىلدى. كەزەكشىلىك تاۋلىك بويى جۇرگىزىلۋدە، وعان پوليتسيا مەن توتەنشە جاعدايلار باسقارماسىنىڭ قىزمەتكەرلەرى تارتىلىپ وتىر.

«2016 -جىلى 15 -شىلدە كۇنى تولىق زەرتتەۋلەردىڭ ناتيجەلەرى نەگىزىندە كارانتين الىنىپ تاستالدى.

قازىرگى ۋاقىتتا ول جەردەگى ەپيزووتيالىق احۋال جەرگىلىكتى جانە وبلىستىق ينسپەكتسيانىڭ جانە اتقارۋشى ورگانداردىڭ باقىلاۋىندا تۇر»، - دەپ اتاپ كورسەتىلگەن حابارلامادا.

شىعىس قازاقستان وبلىسى جارما اۋدانى قالباتاۋ اۋىل وكرۋگىنىڭ «ايعاي كەزەڭ» ۋچاسكەسىنە كارانتين ەنگىزىلگەن بولاتىن. بۇل ايماقتا 220 باس ءىرى قارا، 800 باس ۇساق مال باسى «ءسىبىر جاراسىنا» قارسى ۆاكسياناتسيادان وتكىزىلدى. قازىرگى ۋاقىتتا اۋىلدىق وكرۋگتىڭ اكىمى بەرگەن بۇيرىعى بويىنشا، بۇل جەردەن كارانتين الىنىپ تاستالدى. الايدا ول جەردەگى احۋال جەرگىلىكتى ينسپەكتسيا مەن اتقارۋشى ورگانداردىڭ باقىلاۋىنا بەرىلدى.

پاۆلودار وبلىسى بويىنشا، ۇزىنسۋ اۋىلىندا كارانتين جاريالانعان بولاتىن. ازاماتتاردىڭ يەلىگىندەگى مالدى ۆاكتسيناتسيالاۋ جۇمىستارى جۇرگىزىلدى. مال تەرىسىن تەكسەرۋ بارىسىندا، ءىرى قارا مالدىڭ 23 تەرىسىنەن جانە 1 جىلقى تەرىسىنەن «ءسىبىر جاراسىنىڭ» قوزدىرعىشتارى بارى انىقتالدى. ولار ارنايى جەردە دەرەۋ ورتكە قويىلدى. قازىرگى ۋاقىتتا تەرى كۇلىن تەكسەرۋ جۇرگىزىلۋدە.

بۇعان دەيىن حابارلاعانىمىزداي، 2016 -جىلدىڭ 8 -ماۋسىمى مەن 8 -شىلدەسى ارالىعىندا قازاقستان بويىنشا 16 ادام تۇينەمە جۇقتىرعان. الماتى وبلىسىندا - ءۇش ادام، شىعىس قازاقستان وبلىسىندا - ەكى ادام، قاراعاندى وبلىسىندا سەگىز ادام، پاۆلودار وبلىسىندا ءۇش ادام وسى اۋرۋمەن اۋىرعان. وكىنىشكە قاراي، قاراعاندى وبلىسىندا ەكى، پاۆلودار وبلىسىندا ءبىر ادام قايتىس بولدى. امان قالعان ون ءتورت ادامنىڭ سەگىزى قازىر اۋرۋحانادان شىققان، تاعى التى ادام ستاتسيوناردا(ەمدەۋ ورنىندا) ەم قابىلداۋدا.

اۆتور: جاسۇلان جولدىبايەۆ