اق جايىقتا «قىز جىبەك پەن تولەگەن» اقبوز ات ءمىندى - فوتو

ورال. قازاقپارات - ايگىلى «قىز جىبەك» فيلمىندە باستى كەيىپكەرلەردى سومداعان قازاقستاننىڭ حالىق ءارتىسى قۇمان تاستانبەكوۆ پەن قازاقستاننىڭ ەڭبەك سىڭىرگەن ءارتىسى، «قۇرمەت» وردەنىنىڭ يەگەرى مەرۋەرت وتەكەشەۆا اق جايىق وڭىرىنە كەلىپ، جۇرتشىلىقپەن كەزدەسۋ وتكىزدى.

جىلى شىرايلى جۇزدەسۋ مەرۋەرت وتەكەشەۆانىڭ تۋعان جەرى جانىبەك اۋدانىندا دا ۇيىمداستىرىلدى. وندا اتاقتى ونەر قايراتكەرلەرى بيىل تۇسىرىلگەنىنە 45 جىل تولعان «قىز جىبەك» فيلمىنىڭ شىعۋ تاريحى تۋرالى سىر شەرتتى.

كەڭەس داۋىرىندە مۇنداي تۋىندىنىڭ جارىق كورۋىنە كەدەرگىلەر از بولعان جوق. قازاق ەلىنىڭ سول كەزدەگى باسشىسى دىنمۇحامەد قونايەۆتىڭ قولداۋىمەن، مەملەكەت جانە قوعام قايراتكەرى ءىلياس وماروۆ، كومپوزيتور نۇرعيسا تىلەنديەۆتەي بەلگىلى تۇلعالاردىڭ ۇسىنىسىمەن قولعا الىنعان فيلمنىڭ ويداعىداي شىعۋى ءۇشىن رەجيسسەرى سۇلتان قوجىقوۆ، سۋرەتشىسى گۇلفايرۋز ىسمايىلوۆامەن بىرگە بارلىق ارتىستەر تاباندى ەڭبەك ەتتى. م. وتەكەشەۆانىڭ ەسكە العانىنداي، سول كەزدە ونىنشى سىنىپتى جاڭا عانا بىتىرگەن جاس اكتريسا فاريدا ءشارىپوۆا، ىدىرىس نوعايبايەۆ، انۋاربەك مولدابەكوۆ، اسانالى ءاشىموۆ سىندى ارىپتەستەرىنەن كوپ نارسە ۇيرەندى.

كەزدەسۋ بارىسىندا قۇمان تاستانبەكوۆ اق جايىق ەلىنە ريزاشىلىعىن ءبىلدىرىپ، ماڭگىلىك ماحاببات ايعاعىنداي مۇحتار شاحانوۆتىڭ «ماحاببات جىرى» مەن كومپوزيتور سەرافيم تۋليكوۆتىڭ «پريشلا ليۋبوۆ» اندەرىن ورىنداپ بەردى.

اۋدان اكىمى ناۋرىزباي قاراعويشين مارتەبەلى مەيماندارعا العىسحات تابىس ەتىپ، يىقتارىنا شاپان جابۋمەن بىرگە اقبوز ات مىنگىزدى. شاراعا قاتىسقان وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى داۋلەتكەرەي قۇسايىنوۆ اۋدان تۇرعىندارىنىڭ مەرۋەرت قاراتاي قىزىنداي جەرلەسىمەن ورىندى ماقتاناتىنىن اتاپ ءوتتى.

ايتا كەتەيىك، ساپار بارىسىندا ونەر قايراتكەرلەرىن وبلىس اكىمى التاي كولگىنوۆ قابىلداپ، قۇرمەت كورسەتتى. ءوڭىر باسشىسى «قىز جىبەك» فيلمىنىڭ ءتۇسىرىلۋ تاريحى تۋرالى دەرەكتى تۋىندى دا كەرەكتىگىن ايتىپ، ونى قولداۋعا دايىن ەكەندىگىن ءبىلدىردى. سونىمەن قاتار قادىر مىرزا ءالى اتىنداعى مادەنيەت جانە ونەر ورتالىعىندا وتكەن كەشتە قىز جىبەك پەن تولەگەنگە ورالدا ەسكەرتكىش ورناتۋ تۋرالى ۇسىنىس ورتاعا سالىندى. بۇعان بايلانىستى قۇمان تاستانبەكوۆ تارازداعى ساياباق پەن قىزىلوردا وبلىسى ارال قالاسىنداعى مادەنيەت ءۇيىنىڭ الدىندا وسىنداي ەسكەرتكىشتەر بار ەكەندىگىن ايتىپ، جاستار ءجيى باراتىن مۇنداي قاستەرلى ورىن جايىقتا بولسا، ارتىق ەتپەيتىندىگىن جەتكىزدى.