لوندوندا ماس كۇيىندە كولىك جۇرگىزگەن ق ر ەلشىلىگىنىڭ قىزمەتكەرى جۇمىستان بوساتىلعان

استانا. قازاقپارات - بريتانيا باسىلىمدارى وسى ەلدەگى قازاقستان ەلشىلىگىنىڭ قىزمەتكەرى ماس كۇيىندە كولىك جۇرگىزدى دەگەن اقپارات تاراتقان بولاتىن.

بۇگىن سىرتقى ىستەر مينيسترلىگى باسپا ءسوز قىزمەتىنىڭ جەتەكشىسى ءانۋار جايناقوۆ ول ازامات ەلشىلىك قىزمەتكەرى ەكەنىن، ءبىراق، ديپلومات ەمەس، تەحنيكالىق قىزمەتكەر بولعانىن ايتىپ بەردى.

«ول ەلشىلىك قىزمەتكەرى. ءبىراق، تەحنيكالىق قىزمەتكەرى. ونداي فاكت بولعان. وسى فاكت انىقتالعاننان كەيىن تەحنيكالىق قىزمەتكەر بىردەن ەلگە قايتا شاقىرىلدى. قازىرگى تاڭدا ول ازامات ۇلى بريتانياداعى قازاقستان ەلشىلىگىندە جۇمىس ىستەمەيدى»، - دەدى ءا. جايناقوۆ.

«وسى جەردە باسا ايتا كەتەرلىگىمىز، قازاقستان رەسپۋبليكاسىنىڭ سىرتقى ىستەر مينيسترلىگى مەن قازاقستاننىڭ وزگە مەملەكەتتەردەگى ديپلوماتيالىق مەكەمەلەرى كەز كەلگەن ءتارتىپ بۇزۋشىلىققا «مۇلدە توزبەۋ» ساياساتىن ۇستانادى»، - دەپ تولىقتىردى ءا. جايناقوۆ.

اۆتور: كەنجەكەي توقتامۇرات قىزى