شەكاراشىلار بەس كۇنگە سوزىلعان ەكسترەميزمگە قارسى وقۋ- جاتتىعۋ وتكىزدى - فوتو
بۇل تۋرالى ق ر ۇ ق ك ش ق باسپا ءسوز قىزمەتى حابارلادى.
قازىرگى تاڭدا ەكسترەميزم مەن تەرروريزم ماسەلەسى ۋشىعىپ تۇرعاندىعى بەلگىلى، بۇل ماسەلە ۇلتتىق قاۋىپسىزدىككە دە قاۋىپ- قاتەر توندىرۋدە.
«22 - شىلدەدە قۇرلىقتاعى اسكەرلەردىڭ اسكەري ينستيتۋتىندا بەس كۇنگە سوزىلعان وقۋ- جاتتىعۋدىڭ ەڭ ءبىر بەلسەندى بولىگى وتكىزىلدى. وعان شەكارا قىزمەتىنىڭ بارلىق بولىمشەلەرى، ونىڭ ىشىندە شەكارا اۆياتسياسى، كەمەلەرى مەن كاتەرلەرى، ءتۇرلى اسكەري تەحنيكالارى قاتىستىرىلدى»، دەلىنگەن حابارلامادا.
ەكى وڭىرلىك شەكارا باسقارمالارىنىڭ تۇيىسكەن جەرىندە شەكارا ساقشىلارى شەكارالىق ءىس- شارالاردى وتكىزۋدى ءىس جۇزىندە اتقاردى. ءبىرقاتار مىندەتتەردى شەكاراشىلار قازاقستان رەسپۋبليكاسىنىڭ ۇلتتىق ۇلانى جانە قارۋلى كۇشتەر قۇرىلىمدارىمەن بىرلەسە وتىرىپ اتقاردى.
قازاقستاندىق شەكاراشىلار اسكەري جانە جەدەل- قىزمەتتىك دايىندىقتارىن، ۇيىمدىق- باسقارۋشىلىق قىزمەتتى اتقارا الاتىندىقتارىن، قارۋلى قاقتىعىس كەزىندە كۇش قۇرالدارىن قولدانۋ بارىسىن تەكسەردى.
شتاب جانە مەملەكەتتىك شەكارانى كۇزەتۋگە قاتىسى بار باسقا دا باسقارۋ ورگاندارىنىڭ ىقپالداستىعىن دامىتۋ ءىسىن پىسىقتادى.
شەكارا قۇرىلىمدارىنداعى لاۋازىمدى تۇلعالار ءۇشىن وزدەرىنىڭ فۋنكتسيونالدىق مىندەتتەرىن ءارتۇرلى باعىتتا پىسىقتاۋعا بەرىلگەن جاقسى مۇمكىندىك ەكەندىگىن ايتا كەتۋ كەرەك.
«باتىس-2016» كوپساتىلى جەدەل- تاكتيكالىق كوماندالىق- شتابتىق وقۋ- جاتتىعۋى ءۇش دەڭگەيدە وتكىزىلدى.
ونىڭ ءبىرىنشى دەڭگەيىندە - قازاقستان رەسپۋبليكاسىنىڭ وڭتۇستىك باتىسىنداعى مەملەكەتتىك شەكاراداعى شەكارالىق قارۋلى قاقتىعىستىڭ شارتتى تۇردە باستالۋىنا قاتىستى ءىس- قيمىلدار پىسىقتالدى.
وقۋ - جاتتىعۋدىڭ ەكىنشى دەڭگەيىندە ديۆەرسيالىق - بارلاۋ، بانديتتىك توپتاردى ىزدەستىرۋ، ولاردى ۇستاۋ شارالارى پىسىقتالدى. سونداي- اق قارۋلى قاقتىعىس كەزىندە كورشىلەس ەلدەردەن ءوتۋى مۇمكىن بوسقىنداردى اۋىزدىقتاۋ ماسەلەسىن رەتتەۋ ءىس جۇزىندە كورسەتىلدى.
وقۋ- جاتتىعۋدىڭ ءۇشىنشى دەڭگەيىندە شەكارالىق قارۋلى قاقتىعىستى جويۋعا قاتىستى اسكەري اتىس پراكتيكا جۇزىندە كورسەتىلدى.
شارتتى قارسىلاس رەتىندە كورشىلەس ەلدىڭ اۋماعى الىندى. كورشىلەس ەلدىڭ ۇكىمەتتىك اسكەرلەرى مەن حالىق جاساعى قارسىلاستاردىڭ جاساعىن توقتاتىپ، وزدەرىنىڭ اۋماعىنىڭ كوپ بولىگىنە باقىلاۋ ورناتتى.
كىشكەنە ۇزىلىستەن كەيىن شارتتى قارسىلاس اسكەري جانە ارناۋلى ءىس- شارالاردىڭ ناتيجەسىندە شەكارالاس ايماقتى باسىپ الدى. مەملەكەتتىك شەكارا جولاعىنداعى جاۋاپكەرشىلىكتى كۇشەيتۋ تۋرالى شەشىم قابىلداندى.
شەكارا قىزمەتىنىڭ بىرلەستىكتەرى، قۇرلىمدارى جانە بولىمدەرى مەملەكەتتىك شەكارانى كۇزەتۋدىڭ كۇشەيتىلگەن رەجيمىنە كوشىرىلەدى. جەدەل تۇردە شەكارا قىزمەتىنىڭ رەزەرۆ توبى جاساقتالادى. ولار بەلىگىلەنگەن اۋدانداردا قۇرىلىپ، سول جەرلەردەگى وڭىرلىك باسقارمالاردىڭ قاراماعىنا بەرىلەدى. ولاردى ورنالاستىرۋ جانە اسكەري ءىس- ارەكەتكە ەنگىزۋ ءىس- شارالارى قاراستىرىلادى. تەڭىزدەگى شەكارامىزدى كۇشەيتۋ ءۇشىن كەمەلەر ساپىنان ەكى تاكتيكالىق توپ جاساقتالىپ، ولار تىكۇشاقتار زۆەنوسىمەن كۇشەيتىلەدى.
جاعداي وتە ۋشىققان جاعدايدا ۇلتتىق قاۋىپسىزدىكتى ساقتاۋ ءۇشىن اۋماقتىق بولىمشەلەردە دايىندىق ءىس- شارالارى اتقارىلا باستايدى.
شوعىرلانۋ اۋماعىنا جيناقى توپتار، تاكتيكالىق كەمە توپتارى كەلە باستايدى، سۋاستى ديۆەرسيالىق جانە ميناعا قارسى ءىس- شارالار جۇرگىزىلەدى. الدىڭعى شەپتەگى باسقارۋ بەكەتتەرى، اۆياتسيا توپتارى قۇرىلادى.
شەكارا زاستاۆالارىنىڭ كۇش- قۇرىلىمدارىنىڭ ارقاسىندا شەكارا وتريادتارىنىڭ كۇش- قۇرىلىمدارىن قاتىستىرا وتىرىپ ينجەنەرلىك جابدىقتاۋ ءۇشىن ءىس- شارالار اتقارىلا باستايدى.
شابۋىل كەزىندە قارسىلاستىڭ نەگىزگى كۇشتەرى ايتارلىقتاي شىعىنعا باتتى. سودىرلار جاساقتارىنىڭ ءبىرقاتار بولىگى كورشىلەس مەملەكەتتەردىڭ ءبىرىنىڭ اۋماعىندا قايتادان جاساقتانا باستادى. اسكەري ءىس- قيمىلدار جۇرگىزىلە باستايدى.
جاعداي شىن مانىندە ۋشىعا ءتۇستى. شەكارا زاستاۆالارىنىڭ اۋماعىندا مەملەكەتتىك شەكارانى بۇزعان ازاماتتار شۇعىل تۇردە كوبەيە ءتۇستى.
شەكارا زاستاۆاسىنداعى جاعدايدىڭ ۋشىعۋى مۇمكىن ەكەندىگىن ەسەپكە الا وتىرىپ زاستاۆالار ادام سانىمەن، جانە بورندى تەحنيكالارمەن كۇشەيتىلدى.
مەملەكەتتىك شەكارا توپتىق قارۋمەن قارۋلانعان شەكارا ناريادتارىمەن كۇشەيتىلەدى، ال قاۋىپ- قاتەر ءتونىپ تۇرعان اۋماقتار بروندى تەحنيكامەن كۇشەيتىلەدى. مەملەكەتتىك شەكارادا بەلگىلەنگەن رەجيمدى بۇزۋشىلاردىڭ جولىن كەسۋ باعىتىنداعى ءىس- شارالار اتقارىلادى.
تەڭىز ارقىلى وتەتىن مەملەكەتتىك شەكارا بويىندا دا شەكارالىق ينتسيدەنتتەر كوبەيە تۇسەدى - قۇرلىقتاعى جانە تەڭىزدەگى مەملەكەتتىك شەكارانىڭ بۇزىلۋى، جەكەلەگەن ادامداردىڭ جانە توپتانعان ادامداردىڭ شەكارا بۇزۋى بايقالادى، كورشىلەس مەملەكەتتەن باقىلاۋدىڭ جۇرگىزىلىپ جاتقان دەرەگى تىركەلەدى، شەكارا ناريادتارىن اتۋ دەرەگى تىركەلەدى. بوسقىنداردىڭ تۇراقتى تۇردە كەلۋى بايقالادى.
وسىلايشا بوسقىنداردىڭ سانى ارتا تۇسەدى. ولار شەكارا بويىنا لاگەر تۇرعىزادى. قارسىلاستار وزدەرىنىڭ جىمىسقى پيعىلدارىن ىسكە اسىرۋ ءۇشىن بوسقىن رەتىندە ەنىپ، سودان كەيىن ۇگىت- ناسيحاتتىق، بۇلدىرۋشىلىك، جانسىزداردى ىسكە تارتۋ ارەكەتىن ىسكە اسىرادى. وسى ماقساتتا قارسىلاستار بوسقىندار لاگەرىندە بۇلدىرۋشىلىك ارەكەتىن بەلسەندى تۇردە جۇرگىزە باستايدى، سول ارقىلى شەكارادان جالپىلاي ءوتۋدى كوزدەيدى.
كورشىلەس ءبىر مەملەكەتتىڭ اۋماعىندا قارۋلى قاقتىعىستىڭ ورىن العاندىعى تۋرالى اقپارات كەلىپ تۇسەدى، ول قاقتىعىستىڭ ءبىزدىڭ ەلدىڭ اۋماعىنا قاراي ويىسۋى مۇمكىن ەكەندىگى قاراستىرالادى.
مەملەكەتتىك شەكارانى بۇزىپ وتكەندەر تىركەلەدى. شەكارا زاستاۆالارى شەكارانى بۇزىپ وتۋشىلەردى توقتاتۋ جولىندا اسكەري ءىس قيمىلعا كىرىسەدى.
قۇرامالى اسكەري جاساقتاردىڭ كومەگىمەن اسكەري اۆياتسيانى قولدانا وتىرىپ زاڭسىز وتكەن قارۋلى جاساقتى جويۋ تۋرالى شەشىم قابىلدانادى.
قۇراما وترياد جاساقتارى بەلگىلەنگەن اۋدانعا قاراي مارشپەن قوزعالادى، اۆيتسيانىڭ كومەگى ارقاسىندا ۇرىسقا كىرىسەدى. ۇتىمدى شابۋىل ناتيجەسىندە باسىپ كىرگەن قارسىلاستىڭ كوزى جويىلادى، مەملەكەتتىك شەكارانى قالپىنا كەلتىرۋ بويىنشا ءىس- شارالار اتقارىلادى.
شەكارا قۇرىلىمدارى شەكارانى كۇزەتۋدىڭ قالىپتاعى جاعدايىنا كوشىرىلەدى، تۇراقتى قىزمەت ەتەتىن جەرلەرى بويىنشا رەزەرۆتىك توپتار قايتا جاساقتالادى.
شەكارا ساقشىلارى وسىلايشا وزدەرىنە جۇكتەلەگەن مىندەتتەردى ابىرويمەن ورىنداپ شىقتى، تەرروريزمگە، ەسىرتكى مەن قارۋ- جاراقتىڭ زاڭسىز اينالىمىنا، تابيعي بايلىقتى كونتراباندالىق جولمەن الىپ كەتۋگە، زاڭسىز ميگراتسياعا توسقاۋىل قويىلدى.
ەلىمىزدىڭ ۇلتتىق قاۋىپسىزدىگىن قامتاماسىز ەتۋ باعىتىندا تەرروريزمگە قارسى كۇرەس قاشاندا باسىمدىققا يە ەكەندىگى بەلگىلى.
بۇگىنگى شەكاراشى دەگەنىمىز ول - ءوز وتانىنىڭ پاتريوتى، بەدەلدى دە ابىرويلى، تەرەڭ ءبىلىم يگەرگەن، ادامگەرشىلىك قاسيەتى جوعارى، كەز- كەلگەن ساتتە قينالعان جانعا كومەك قولىن سوزۋعا دايىن، ەلى مەن جەرىن قاسىق قانى قانى قالعانشا قورعاي بىلەتىن مامان ەكەندىگى انىق، ونى بۇگىنگى وقۋ- جاتتىعۋ بارىسىندا دالەلەدەي ءبىلدى.
