ميۋنحەندە اتىس ۇيىمداستىرعان جىگىت قىلمىستى ءبىر جىل بويى جوسپارلاعان

استانا. قازاقپارات - ميۋنحەندە اتىس ۇيىمداستىرعان جىگىتتىڭ ءۇيىن ءتىنتۋ بارىسىندا تەرگەۋشىلەر ونىڭ بۇل قىلمىسقا ۇزاق دايىندالعانىن ايعاقتايتىن دالەلدەر تاپتى.

پوليتسيا مالىمەتى بويىنشا، قىلمىسكەر دايىندىقتى ءبىر جىل بۇرىن باستاعان، دەپ جازادى ر ب ك.

سونداي-اق تەرگەۋشىلەر قىلمىسكەردىڭ قارۋدى ينتەرنەت ارقىلى زاڭسىز العانىن انىقتادى.

وسىعان دەيىن پروكۋراتۋرا وكىلى توماس شتاينكراۋس-كوح قىلمىسكەردىڭ پسيحيكالىق اقاۋى بار بولۋى مۇمكىن دەپ مالىمدەگەن بولاتىن. ونىڭ ايتۋىنشا، جىگىت دەپرەسسياعا بايلانىستى دارىگەردىڭ كومەگىنە جۇگىنگەن. سونىمەن بىرگە پوليتسيا 18 جاستاعى گەرمانيا ازاماتىنىڭ توعىز وقپاندى Glock تاپانشاسىن پايدالعانعانىن، ونىڭ سومكەسىنەن 300 پاترون تابىلعانىن حابارلادى. شابۋىلداۋشى جىگىت مەكتەپتە وقىعان، ونىڭ بولمەسىن ءتىنتۋ كەزىندە جالعىز ادامنىڭ قارۋلى شابۋىل جاساۋى تۋرالى اقپاراتتار بەرىلگەن ءتۇرلى گازەتتەر مەن جۋرنالدار تابىلعان.

سونىمەن بىرگە رەسمي ورگان قىلمىسكەردىڭ يسلام مەملەكەتى لاڭكەستىك ۇيىمىنا قاتىسى بار ەكەندىگىن ايعاقتايتىن ەش دالەل تاپپاعانىن ايتتى.

ەسكە سالا كەتەيىك، 22- شىلدە كۇنى كەشكى ۋاقىتتا ميۋنحەندەگى «وليمپيا» ساۋدا ءۇيى ماڭىندا بەلگىسىز بىرەۋ وق جاۋدىرىپ، 10 ادام قازا تاپتى. ونىڭ ىشىندە اتىستى ۇيىمداستىرعان جىگىت تە بار. بەلگىلى بولعانداي، ونىڭ ەسىمى داۆيد سونبولي، يران تۋماسى، جاسى 18 دە.