بەيجىڭدەگى تابيعي ساياباقتا جولبارىس ادامدى تالاپ ءولتىردى

استانا. قازاقپارات - بەيجىڭ ماڭىنداعى بادالين جابايى تابيعات پاركىنىڭ كەلۋشىلەرىنە ءسىبىر جولبارىسى شاپتى، جارالانعان ايەل كوپ ۇزاماي مەرت بولدى، دەپ جازدى «فاچجي ۆانباو» گازەتى.

وقيعا سەنبى كۇنى بولعان. ساياباق اۋماعىندا قىدىرىپ جۇرگەن ايەلدەر اۆتوكولىكتەن شىعىپ، ونىڭ قاۋىپسىزدىك ەرەجەسىن بۇزعان. جاقىن ماڭدا جۇرگەن جولبارىس ايەلدەردى بايقاپ قالىپ، تۇتقيىلدان باس سالعان، دەپ حابارلادى ر ي ا نوۆوستي.

جاراقات العان ءبىر ايەل وقيعا ورنىندا كوز جۇمدى. جاعدايدى بايقاعان پارك قىزمەتكەرلەرى كەلىپ، جارالانعان ەكىنشى ايەلدى اۋرۋحاناعا جەتكىزدى. پارك ەكى كۇنگە جابىلىپ، قايعىلى وقيعا سالدارىن انىقتاۋ ءۇشىن ارنايى كوميسسيا قۇرىلدى.

باسىلىمنىڭ جازۋىنشا، پارك قىزمەتكەرلەرى داۋىس زورايتقىشى ارقىلى كەلۋشىلەرگە اۆتوكولىكتەن شىعۋعا قاتاڭ تىيىم سالىناتىنىن ءجيى-ءجيى ەسكەرتەدى.

ءدال وسىنداي جاعداي پاركتە 2009-جىلى ورىن العان. ۇلى قىتاي قورعانىنان ءوز بەتتەرىمەن ءتۇسىپ، پارك ارقىلى جول قىسقارتقىسى كەلگەن ءۇش تۋريست ءسىبىر جولبارىسىنا تاپ كەلدى. تۋريستەردىڭ ءبىرى قازا تاۋىپ، ەكەۋى امان قالدى.

بەيجىڭ ماڭىنداعى بادالين جابايى تابيعات پاركى ۇلى قىتاي قورعانىنىڭ تومەنگى تۇسىندا ورنالاسقان. ونىڭ اۋماعى 400 گەكتاردى الىپ جاتىر جانە ول - قىتايداعى ءىرى پاركتەردىڭ ءبىرى. پارك اۋماعىندا 10 مىڭعا جۋىق حايۋانات ءومىر سۇرەدى، ولاردىڭ اراسىندا سيرەك كەزدەسەتىن ءسىبىر جولبارىستارى بار.