ماقسات بازاربايەۆ «مۋزارت» توبىنان كەتۋىنىڭ سەبەبىن ايتتى
بۇل تۋرالى 31-ارنا حابارلايدى.
ماقسات بازاربايەۆ توپتان كەتكەن سوڭ 9 اي بويى كۇيزەلىستە بولعان. كوپكە دەيىن قينالىپ، كەنجەبەكتى ەڭ العاش كورگەن كەزدە ءوز-ءوزىن قولعا الۋى كەرەكتىگىن تۇسىنگەن. وسى ساتتەن باستاپ ءوزىن-ءوزى قولعا الىپ، جەكە شىعارماشىلىعىن دامىتۋعا كىرىسكەن.
«ونەر بولعان سوڭ بارلىعى دا بولادى. مۇمكىن بۇل توپتا جۇرە بەرسەم، حالىق بىزدەن جالىعىپ كەتەر مە ەدى؟! مەرەيتويدا ساكەن، مەيرامبەك ۇشەۋىمىز ەڭ العاشقى اندەرىمىزدىڭ ءبىرىن ورىندادىق. ول مۇقاعالي ماقاتايەۆتىڭ «سەنىڭ كوزىڭ» اتتى ءانى بولعان. بويىمدى ساعىنىش وتى كەرنەپ، ۋاقىت 15 جىل ارتقا جىلجىعانداي بولدى. قۇددى 25 جاسىمىز قايتا كەلىپ جاتقانداي. ول كەزدە وت ەدىك قوي»، - دەدى ول.
«ءبىر شەتىنەن «مۋزارتتان» كەتكەنىم دە دۇرىس بولدى. سەبەبى، وتباسىڭمەن، اتا-اناڭمەن جايشىلىقتا قىدىرىپ، كوشەدە ەركىن جۇرگىڭ كەلەدى. مۇزارتتا ءجۇرىپ ەش ۋاقىتتا جۇلدىز اۋرۋىمەن اۋىرعان ەمەسپىن. مەن بۇل اۋرۋدى مەكتەپ قابىرعاسىندا باسىمنان وتكەرگەن ەدىم»، - دەيدى ماقسات بازاربايەۆ.
كوپشىلىك سول ۋاقىتتا ءانشىنى مەيرامبەكپەن سىيى جاراسپاي كەتتى دەپ ويلاعان-دى. بازاربايەۆ اتالعان ارنانىڭ تىلشىلەرىنە بولعان جايدى اشىپ ايتتى.
«بىلمەگەن ادامدار ءارتۇرلى ايتىپ جاتادى. مەن بار بولعانى ءوزىمنىڭ جەكە شىعارماشىلىعىمدى جالعاستىرعىم كەلدى. ارامىزدا ەشقانداي ۇرىس، تۇسىنىسپەۋشىلىك بولمادى. ارينە، كوكەيىمدە وكىنىش بار. وكىنبەيتىندەي تاس جۇرەك ەمەسپىن عوي. قارىم-قاتىناسىمىزدا ەش سىزات جوق. ءالى كۇنگە دەيىن قۋانىشىمىز بەن قايعىمىز ورتاق»، - دەدى ءانشى.
