شەتەلدىك ب ا ق: رەسەي قۇراماسى وليمپيادا ويىندارىنان تولىق قۇرامدا شەتتەتىلدى
مۇنىڭ بىردەن ءبىر سەبەبى دوپينگ داۋى بولۋى مۇمكىن.
بۇل تۋرالى gazeta.ru حابارلايدى.
ناقتىراق ايتساق، بريتانيالىق تانىمال Daily Mail باسىلىمىندا جارىق كورگەن ماقالاعا قاراعاندا، حالىقارالىق وليمپيادا كوميتەتى (ح و ك) بۇكىل رەسەي قۇراماسىن «مەملەكەتتىك دوپينگتىك باعدارلاماسى» ءۇشىن جازالاۋعا بەكىنىپ وتىرعان كورىنەدى.
كوميتەتتەگى سەنىمدى دەرەك كوزىنىڭ حابارلاۋىنشا، وسى ارقىلى ح و ك «دوپينگتىڭ - سپورت اتاۋلىعا جاسالعان شابۋىل» ەكەنىن كورسەتىپ دالەلدەمەكشى. سونداي-اق رەسەي قۇراماسىن 2018-جىلى وڭتۇستىك كورەيادا وتەتىن قىسقى وليمپيادا ويىندارىنان دا شەتتەتۋ ماسەلەسى قاراستىرىلىپ جاتىر.
رەسەيلىك كوماندانىڭ ريو وليمپياداسىنا قاتىسۋ-قاتىسپاۋ تۋرالى ماسەلەسىن ح و ك رەسمي تۇردە بۇگىن قابىلداپ قالۋى ىقتيمال. ريو-دە-جانەيروداعى وليمپيادا ويىندارى 5-21- تامىز ارالىعىندا وتەدى.
