ا. مىرزاحمەتوۆ شارۋاشىلىق جۇرگىزۋدىڭ شاعىن فورمالارىن دامىتۋدى ۇسىندى

استانا. قازاقپارات - قر پرەمەر- ءمينيسترىنىڭ ورىنباسارى - اۋىل شارۋاشىلىعى ءمينيسترى اسقار مىرزاحمەتوۆ اتىراۋ وبلىسى اۋىل شارۋاشىلىعىنىڭ اعىمداعى جاعدايى جانە دامۋ پەرسپەكتيۆالارى ماسەلەلەرى بويىنشا وتكەن كەڭەستە ءسۇت قابىلداۋ پۋنكتتەر جەلىسى مەن وتباسىلىق بورداقىلاۋ الاڭدارىن قۇرۋ كەرەكتىگىن ايتتى.

«2015-جىلدىڭ قورىتىندىسى بويىنشا رەسپۋبليكادا 675 مىڭنان استام ادام جەكە قوسالقى شارۋاشىلىق جۇرگىزۋمەن اينالىسادى. ءسۇت جانە ەتتىڭ %70-80 ى جەكە قوسالقى شارۋاشىلىقتاردا وندىرىلەدى. الايدا، مال شارۋاشىلىعى ونىمدەرىنىڭ اتالعان كولەمى ونىمدەردى دايىنداۋ جانە وتكىزۋ ماسەلەلەرىنىڭ شەشىلمەۋىنە بايلانىستى قايت وندەۋگە جەتكىزىلمەيدى، وسىنىڭ سالدارىنان قايتا وندەۋشى كاسىپورىندار تەك %60 ى عانا جۇكتەلگەن»، - دەدى ول.

«وسىعان وراي، نەگىزگى شارا رەتىندە ءبىز اۋىل شارۋاشىلىعى كووپەراتيۆتەرى قۇرىلىمىنداعى شارۋاشىلىق جۇرگىزۋدىڭ شاعىن فورمالارىن دامىتۋدى ۇسىنامىز. اتاپ ايتقاندا، ءسۇت قابىلداۋ بويىنشا پۋنكتتەر جەلىسى مەن وتباسىلىق بورداقىلاۋ الاڭدارىن قۇرۋ»، - دەپ اتاپ ءوتتى مينيستر.

ونىڭ ايتۋىنشا، قۇرىلاتىن اۋىل شارۋاشىلىعى كووپەراتيۆتەرى قوسىمشا ءجۇن مەن تەرى دايىنداۋ، جەمىسكوكونىستەردى دايىنداۋ، ارا شارۋاشىلىعى، وتباسىلىق قۇس شارۋاشىلىعى، تاۋارلى بالىق شارۋاشىلىعى ارقىلى دامىتىلماق.

ايتا كەتەيىك، بۇگىن ا. ي. مىرزاحمەتوۆ جۇمىس ساپارىمەن اتىراۋ وبلىسىنا كەلگەن بولاتىن. مۇنىڭ الدىندا ءمينيستردىڭ توراعالىعىمەن ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىندە جەر رەفورماسى بويىنشا كوميسسيا مۇشەلەرىنىڭ اتىراۋ وبلىسى حالقىمەن كەزدەسۋى بولىپ ءوتتى، دەپ حابارلادى ا ش م باسپا ءسوز قىزمەتىنەن.