ميۋنحەندە وقيتىن ەكى قازاق ستۋدەنتى تۋرالى تولىق اقپارات الىندى
شىنى كەرەك، تەراكت كەزىندە قازاقستاننىڭ ءبىر ەمەس، ءتورت ازاماتى قازا تابادى دەپ ويلاماعان ەدىك. سوندىقتان، قازىر شەت ەلدەردە ورىن العان كەز كەلگەن وقىس وقيعادا الدىمەن ءوز ازاماتتارىمىزدىڭ اماندىعىن بىلۋگە اسىعاتىن بولدىق.
وكىنىشكە قاراي، كەشە ميۋنحەن قالاسىندا دا قارۋلى قىلمىسكەر ونشاقتى ادامنىڭ ءومىرىن قيدى. وقيعا قالاداعى ءىرى ساۋدا ورنىندا بولعاندىقتان، ول جەردە كەز كەلگەن ۇلت وكىلىنىڭ ءجۇرۋى ابدەن مۇمكىن ەدى. سوندىقتان، دەمالىس كۇنىنە قاراماستان، تاڭەرتەڭنەن بەرى ق ر سىرتقى ىستەر مينيسترلىگىنىڭ، گەرمانياداعى قازاقستان ەلشىلىگىنىڭ، ميۋنحەندەگى قازاقستان كونسۋلدىعىنىڭ، «بولاشاق» قاۋىمداستىعىنىڭ تەلەفونىنا تىنىم بەرمەي، ءبىز سول ەلدەگى ازاماتتارىمىز بەن ستۋدەنتتەرىمىز جايلى اقپارات جينادىق. ىزدەنىسىمىز زايا كەتپەي، ميۋنحەندە «بولاشاق» باعدارلاماسى ارقىلى ءبىلىم الىپ جۇرگەن ەكى قازاق ستۋدەنتىنىڭ امان ەكەنىنەن حاباردار بولدىق.
«ميۋنحەن قالاسىندا «بولاشاق» باعدارلاماسى بويىنشا ايان يساحانوۆ پەن بيبىگۇل شەكتىبايەۆا اتتى ەكى ستۋدەنت ءبىلىم الادى. ولارعا حابارلاستىم. ەكەۋى دە امان- ەسەن»، - دەدى «بولاشاق» باعدارلاماسىنىڭ بەرليندەگى وكىلى ايمان اۋباكىروۆا.
گەرمانياداعى قازاقستان ەلشىلىگىنىڭ قىزمەتكەرلەرى حابارلاعانداي، كەشەگى وقيعادان كەيىن ەلشىلىك قىزمەتكەرلەرى ميۋنحەن قالاسىنداعى جانە جالپى گەرمانيادا جۇرگەن قازاقستان ازاماتتارىنا ساقتىق شارالارى تۋرالى ايتىپ، دەمالىس كۇندەرى ادام كوپ جينالاتىن ورىندارعا بارماۋعا كەڭەس بەرگەن.
ق ر سىرتقى ىستەر مينيسترلىگى باسپا ءسوز قىزمەتىنىڭ جەتەكشىسى ءانۋار جايناقوۆ ءمالىم ەتكەندەي، سوڭعى اقپارات بويىنشا ميۋنحەندەگى اتىس كەزىندە قازا تاپقانداردىڭ اراسىندا قازاقستان ازاماتتارى جوق. ال، جالپى، قالادا قازاقستاننىڭ نەشە ازاماتى ءبىلىم الىپ، جۇمىس ىستەيدى دەگەن سۇراقتىڭ جاۋابىن تەك رەسمي ساۋال ارقىلى بىلۋگە بولاتىنىن ايتتى.
اۆتور: كەنجەكەي توقتامۇرات قىزى
