گەرمانيادا توعىزقۇمالاقتان ەۋروپا چەمپيوناتى باستالدى - فوتو
بۇگىن باستالعان ەۋروپا چەمپيوناتىنا قازاقستان، گەرمانيا، فرانسيا، گرەكيا، شۆەيتساريا، يسپانيا، رەسەي، چەحيا مەن تاعى باسقا ون ەلدىڭ سپورتشىلارى قاتىسىپ جاتىر.
بۇل تۋرالى قازاقپارات تىلشىسىنە حالىقارالىق توعىزقۇمالاق فەدەراتسياسىنىڭ باسپا ءسوز قىزمەتى حابارلادى.
دەرەككوزىنە سۇيەنسەك، ەۋروپا چەمپيوناتىنىڭ اشىلۋىنا دۇنيەجۇزىلىك توعىزقۇمالاق فەدەراتسياسىنىڭ پرەزيدەنتى ءاليحان بايمەنوۆ پەن قازاقستان مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءتوراعاسى ەلسيار قاناعاتوۆ، شۆاينفۋرت مەرى كارل حاينتس كاۋچوك قاتىسقان.
«چەمپيونات - ينتەللەكتۋالدىق سايىس، مادەني شارا عانا ەمەس، مادەني مۇرامىزدى ناسيحاتتاۋ جولى. ال، بۇل - دۇنيەجۇزىلىك فەدەراتسيانىڭ قۇرىلعان كۇنىنەن باستاپ العا قويعان مىندەتتەرىنىڭ ءبىرى»، - دەپ اتاپ ءوتتى جارىستىڭ اشىلۋ سالتاناتىندا ءاليحان بايمەنوۆ.
دۇنيەجۇزىلىك فەدەراتسيا 2009 -جىلدان بەرى توعىزقۇمالاقتان ءۇش رەت الەم چەمپيوناتىن وتكىزگەن. قازىرگى تاڭدا توعىزقۇمالاقپەن اينالىساتىن قازاقستاندىقتار سانى 200 مىڭ ادامنان استى. الدا ازيا چەمپيوناتىن ۇيىمداستىرۋعا قىتاي وكىمەتى ءوز تاراپىنان قولداۋ كورسەتۋگە نيەت ءبىلدىرىپ وتىر.
اۆتور: كەنجەكەي توقتامۇرات قىزى
