ميۋنحەندە تۇراتىن قازاقستان ازاماتشاسى قالاداعى جاعداي تۋرالى ايتىپ بەردى

استانا. قازاقپارات - ءوزىنىڭ اتى-ءجونى مەن جۇمىس ورنىن قۇپيا ۇستاۋدى وتىنگەن ميۋنحەن قالاسىنداعى ا. ەسىمدى قازاقستان ازاماتشاسى كەشە تۇندە اتىسقا بايلانىستى ۇزاق ۋاقىتقا دەيىن جۇمىستان شىقپاي، قالاداعى جاعدايدىڭ تىنىشتالعانىن كۇتكەن.

بۇل تۋرالى ول بىزگە فەيسبۋك الەۋمەتتىك جەلىسىندە اڭگىمەلەپ بەردى.

«ابىروي بولعاندا، مەن وقيعا ورنىنان الىس جۇرگەنمىن. ءبىراق، ءتۇن ورتاسىنا دەيىن جۇمىستا وتىرىپ، كولىكپەن ۇيگە قايتتىم. جول بويى جاعدايدىڭ تىنىشتالعانىن بايقادىم. كەشە تۇنگى ساعات 23.00 دە قالاداعى جاعداي ابدەن تىنىشتالدى دەۋگە بولادى. دەگەنمەن، بىرنەشە پوليتسيا كولىگى دابىلىن باياۋ قوسىپ، كوشەدە ءجۇردى. پاترۋلدەر باياۋ جۇرىسپەن، قالاداعى ادامداردى قاراپ ءجۇردى. بۇگىن ازىرگە ۇيدەن شىققان جوقپىن»، - دەيدى ول.

ەستەرىڭىزگە سالا كەتەيىك، كەشە استانا ۋاقىتىمەن كەشكى ساعات 22.00 دە (ميۋنحەندە ساعات شامامەن كەشكى 18.00 بولعان) ميۋنحەندەگى «وليمپيا» ساۋدا ورتالىعىندا، كارلسپلاتس الاڭىندا جانە مەترو ستانساسى جانىندا اتىس بولدى.

سوڭعى مالىمەتتەر بويىنشا، ميۋنحەندەگى ساۋدا ورتالىعىندا بولعان اتىستان قازا بولعانداردىڭ سانى توعىز ادامعا جەتتى. پوليتسيا مالىمەتتەرى بويىنشا، توعىزىنشى بولىپ مەرت بولعان شابۋىل جاساعان اتقىشتاردىڭ ءبىرى بولۋى مۇمكىن. ونىڭ قىزىل سومكەسى بولعان، وندا بومبا بولۋى ىقتيمال ەكەنى ايتىلعان.

اۆتور: كەنجەكەي توقتامۇرات قىزى