ريودا بوكسشىلارىمىزدىڭ جارىسقا شىعاتىن كۇندەرى بەلگىلى بولدى

استانا. قازاقپارات - ريو وليمپيادادا بوكسشىلارىمىزدىڭ جارىسقا شىعاتىن كۇندەرى بەلگىلى بولدى.

ريودا قازاق بوكسشىلارى تامىزدىڭ 6 -كۇنى شارشى الاڭعا شىعا باستايدى. وسى كۇنى ساعات جەرگىلىكتى ۋاقىتپەن 11:00 دە 60 كەلى سالماقتا ءبىرىنشى بولىپ شارشى الاڭعا ب. ءابدىراحمانوۆ شىعادى. ال 17:00 دە 81 كەلى سالماقتاعى بوكسشىمىز ءا. نيازىمبەتوۆ پەن 91 كەلى سالماقتاعى ۆ. لەۆيتتىڭ ونەرىن تاماشالاي الامىز.

جارىستىڭ ەكىنشى كۇنى 7 -تامىزدا 11:00 دە وسىمەن وليمپياداعا ءۇشىنشى رەت قاتىسقالى وتىرعان ەڭ جەڭىل سالماق - 49 كەلىدەگى ب. جاقىپوۆ ونەر كورسەتەدى. ال 17:00 دە 81 جانە 91 كەلىدەگى بوكسشىلار سىنعا تۇسەدى.

تامىزدىڭ 8- كۇنى 11:00 دە قازاقستان ۇلتتىق قۇراماسىنىڭ كوماندا كاپيتانى 69 كەلىدەگى د. ەلەۋسىنوۆتىڭ جەكپە- جەگىنە كۋا بولامىز. وسى كۇنى ساعات 17:00 دە تاعى ءبىر باتىرىمىز ج. ءالىمحان ۇلى شارشى الاڭعا شىعادى.

 تامىزدىڭ 9 - كۇنى 11:00 دە 60 كەلى سالماقتاعى بوكسشىلار اراسىنداعى ىرىكتەۋ جارىستارى وتەدى. ال 17:00-دە 75 كەلى سالماقتاعى بوكسشىلار مەن 91+ كەلىدەگى بوكسشىلار اراسىنداعى جەكپە- جەكتەردى تاماشالايتىن بولامىز. بۇل كۇنى قازاق بوكسشىلارىنىڭ اراسىنداعى اسا اۋىر سالماقتاعى ي. دىچكو ونەر كورسەتەدى.

تامىزدىڭ 10-ى كۇنى ساعات 11:00 دە 49 كەلى سالماق دارەجەسىندەگى بوكسشىلاردىڭ شيرەك فينالدىق باسەكەلەرى باستالادى. وسى كۇنى ساعات 17:00 دە قازاق بوكسشىلارىنان 56 كەلىدەگى ق. ەراليەۆ پەن 64 كەلىدەگى ا. ءجۇسىپوۆ شارشى الاڭعا شىعادى. سونداي-اق، 81 جانە 91 كەلى سالماقتاعى بوكسشىلار اراسىندا شيرەك فينالدىق باسەكەلەر وتەدى.

تامىزدىڭ 11- كۇنى 56، 64، 69، جانە 81 كەلى سالماقتاعى بوكسشىلار اراسىندا ىرىكتەۋ سىندارى جالعاسادى. تامىزدىڭ 12 سى بوكستان قىزدار اراسىنداعى جەكپە- جەكتەر باستالادى. بۇل كۇنى ساعات 11:00 دە 51 كەلى سالماقتا ونەر كورسەتەتىن قارىنداسىمىز ج. شەكەربەكوۆانىڭ ونەرىن كورە الامىز. ال 13 تامىزدا 11:00-دە 52 كەلى سالماقتا و. ساتتىبايەۆ شارشى الاڭعا شىعادى. وسى كۇنى ساعات 17:00 دە 69 كەلىدەگى بوكسشىلار اراسىندا شيرەك فينالدىق دودالار وتسە، 91 كەلى سالماقتا جارتىلاي فينالدىق باسەكەلەر وتەدى. ال 91+ كەلى سالماقتاعى بوكسشىلار اراسىندا ىرىكتەۋ ويىندارى ارى قاراي جالعاسىن تابىدى. تامىزدىڭ 14 كۇنى ساعات 11:00 دە ەكىنشى بوكسشى قىزىمىز د. شاكيموۆا شىرشى الاڭعا كوتەرىلەدى. ال تامىزدىڭ 15- كۇنى ساعات 11:00 دە 52 جانە 75 كەلى سالماقتاعى بوكىسشىلار اراسىندا ىرىكتەۋ ويىندارى جالعاسادى. 69 كەلىدە جارتىلاي فينالدىق ويىندار وتەدى.

17:00 دە 91 كەلى سالماقتاعى بوكسشىلار اراسىندا فينالدىق ويىندار وتەدى. تامىزدىڭ 16-سى كۇنى بوكستان ايەلدەر اراسىندا 51 كەلى سالماقتان شيرەك فينالدىق جەكپە- جەكتەر وتەتىن بولادى. 17- تامىز ساعات 14:00 دە 75 كەلى سالماقتاعى قىزداردىڭ شيرەك فينالدىق باسەكەلەرى وتەدى. ال تامىزدىڭ 18- كۇنى ايەلدەر اراسىندا 51 كەلى سالماقتاعى بوكسشىلاردىڭ جارتىلاي فينالدىق جەكپە- جەكتەرى وتەدى.

19 تامىزدا ساعات 14:00 دە 75 كەلى سالماقتاعى قىزدار جارتىلاي فينالدىق جەكپە- جەكتەرىن باستايدى. 20 -تامىزدا 14:00 دە 51 كەلى سالماقتاعى بوكسشى ارۋلار اراسىنداعى فينالدىق دودار باستالادى. 75 كەلى سالماقتاعى قىزدار اراسىنداعى بوكسشىلاردىڭ فينالدىق جەكپە-جەكتەرى 21 -تامىز ساعات 14:00 دە باستالادى.

اۆتورى: كۇنسۇلتان وتارباي