تۇركيادا تۋعان قازاق قىز: وزگە ەلدە تۋسام دا، ءوز ەلىمنىڭ اتىنان وليمپياداعا بارۋ مەن ءۇشىن ەڭ ۇلكەن قۋانىش - فوتو

استانا. قازاقپارات - ريو وليمپياداسىندا تاەكۆوندودان قازاق ەلىنىڭ نامىسىن ءبىر ەر، ەكى ايەل سپورتشى قورعايتىنى تۋرالى وسىعان دەيىن ايتقان بولاتىنبىز.

ولار - رۋسلان جاپاروۆ، اينۇر ەسبەرگەنوۆا مەن جانسەل دەنيز.

ەستەرىڭىزگە سالا كەتەيىك، جامبىل وبلىسىنىڭ تۋماسى 20 جاستاعى رۋسلان جاپاروۆ وليمپيادادا قازاقستان قۇراماسىنىڭ بايراعىن ۇستاپ شىعادى.

قىزدار اراسىنداعى باسەكەدە سىنعا تۇسەتىن قىزىلوردالىق 18 جاستاعى اينۇر ەسبەرگەنوۆا - جاس تا بولسا ءبىراز بيىكتەردى باعىندىرىپ ۇلگەرگەن تالانتتى سپورتشىلاردىڭ ءبىرى. اينۇر قارىنداسىمىزدىڭ سپورتتاعى جەتىستىكتەرىن وسىعان دەيىن جازعان بولاتىنبىز.

ەندى ءۇشىنشى سپورتشىمىز جانسەل دەنيزگە كەلسەك. بۇل سپورتشىنىڭ ەسىمى بۇرىن سپورت جانكۇيەرلەرىنە اسا تانىس ەمەس. سەبەبى، جانسەل - تۇركيادا دۇنيەگە كەلگەن قازاق قىزى. ول جات جەردە تۋىپ وسسە دە سپورتتى جاستايىنان جانىنا سەرىك ەتكەن.

جانسەل دەنيز 25 جاستا (26/08/1991)، تۇركياداعى قازاق وتباسىندا تۋعان. ءىرى جەڭىستەرى بولماسا دا ءتۇرلى حالىقارالىق جارىستاردىڭ جۇلدەگەرى. 2013 -جىلى رەسەيدىڭ چەليابينسك قالاسىندا وتكەن اشىق ءتۋرنيردىڭ جەڭىمپازى، ەۋروپا چەمپيونى. تۇركيانىڭ سەگىز دۇركىن چەمپيونى، Austrian Open تۋرنيرىنىڭ ەكى مارتە كۇمىس جانە قولا جۇلدەسىن ەنشىلەگەن، Russian Open جەڭىمپازى، Dutch Open مەن Trelleborg Open جارىستارىنىڭ قولا جۇلدە يەسى، Ukraine Open جانە Moldova Open تۋرنيرلەرىنىڭ ەكى مارتە كۇمىس مەدالىن ولجالاعان.

ول وليمپياداعا دەيىن 67+، 73+ سالماقتاردا سىنعا ءتۇسىپ كەلگەن. جانسەلدى تۇركيا قازاقتارى اراسىنداعى مۇستافا وزتۇرىك باستاعان تاەكۆوندو جولىن جالعاستىرۋشىلاردىڭ ءبىرى دەۋگە بولادى. جانسەل 2014 -جىلدىڭ سوڭىندا قازاقستان ازاماتتىعىن العان. وليمپيادادا 67+ كەلى سالماقتا ونەر كورسەتەدى.

ول ريو وليمپياداسىنا جولدامانى فيليپپين ەلىنىڭ مانيلا قالاسىندا وتكەن ازيا قۇرلىعى بويىنشا ىرىكتەۋ تۋرنيرىندە جەڭىپ العان بولاتىن.

جانسەلمەن جاقىندا حابارلاسقانىمىزدا «العاشقى قاتىسقالى وتىرعان وليمپيادامدا العاش رەت قازاق ەلىنىڭ تۋىن جەلبىرەتىپ شىققالى وتىرمىن. وزگە ەلدە تۋسام دا، ءوز ەلىم اتىنان وليمپياداعا بارۋ مەن ءۇشىن ەڭ ۇلكەن قۋانىش. ەندىگى ماقسات - ۇلت نامىسىن ۇياتقا قالدىرماۋ. قازىر وسى ماقساتقا جەتۋ ءۇشىن بارىنشا تەر توگىپ جاتتىعىپ جاتىرمىن. ارمانىم ريودا جەڭىس تۇعىرىنان كورىنىپ، ەل ءۇمىتىن اقتاۋ»، - دەپ ءسوزىن قىسقا قايىردى.

بىزدە وتانىنا ورالىپ، ۇلكەن دودادا باق سىنايتىن قارىنداسىمىزعا ساتتىلىك تىلەدىك...

 

اۆتور: كۇنسۇلتان وتارباي