ق. توقايەۆ جەنەۆاداعى حالىقارالىق ۇيىمدار باسشىلارىمەن كەزدەستى
ق ر پارلامەنت سەناتىنىڭ باسپا ءسوز قىزمەتىنىڭ حابارلاۋىنشا، ب ۇ ۇ باس حاتشىسىنىڭ ورىنباسارى، ب ۇ ۇ- نىڭ جەنيەۆاداعى بولىمشەسىنىڭ باس ديرەكتورى مايكل مەللەرمەن كەزدەسۋ بارىسىندا حالىقارالىق كۇن ءتارتىبىنىڭ وزەكتى پروبلەمالارى، ب ۇ ۇ- نىڭ قارۋسىزدانۋ جونىندەگى كونفەرەنسياسىنىڭ قىزمەتى بويىنشا پىكىر الماسۋ بولدى. م. مەللەر قازاقستاندى 2017-2018 -جىلدارعا ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانۋىمەن قۇتتىقتاپ، ەلىمىزگە وسى جاۋاپتى ميسسيانى جۇزەگە اسىرۋدا تابىس تىلەدى.
پرەزيدەنت نۇرسۇلتان نازاربايەۆتىڭ «الەم. XXI عاسىر» مانيفەسىنىڭ نەگىزگى ەرەجەلەرىنە اڭگىمەلەسۋشىنىڭ نازارىن اۋدارا وتىرىپ، ق. توقايەۆ قازاقستاننىڭ باستاماسى بويىنشا 2015 -جىلعى 7 -جەلتوقساندا ب ۇ ۇ- نىڭ باس اسسامبلەياسى قابىلداعان يادرولىق قارۋدان ازات الەم قۇرۋعا قاتىستى جالپىعا بىردەي دەكلاراتسيانى ىسكە اسىرۋدىڭ ماڭىزدىلىعىن اتاپ كورسەتتى. سەنات ءتوراعاسى ب ۇ ۇ- نىڭ جەنيەۆاداعى كەڭسەسىنىڭ باسشىسىن
سەمەي يادرولىق سىناق پوليگونى جابىلۋىنىڭ 25 جىلدىعىنا بايلانىستى اعىمداعى جىلعى 29 -تامىزدا استانادا وتەتىن «يادرولىق قارۋسىز الەم قۇرۋ» اتتى حالىقارالىق كونفەرەنسياعا شاقىردى.
دۇنيەجۇزىلىك ساۋدا ۇيىمىنىڭ باس ديرەكتورى روبەرتو ازيەۆەدومەن كەزدەسۋ بارىسىندا جاھاندىق ساۋداداعى نەگىزگى ۇردىستەر، ەكونوميكالىق رەفورمالار، ينۆەستيتسيالىق ساياسات جانە ەكونوميكانىڭ باسىم سەكتورلارىن قولداۋ شارالارى تۋرالى اڭگىمە بولدى. ق. توقايەۆ ر. ازيەۆەدوعا پرەزيدەنت ن. نازاربايەۆتىڭ سالەمىن جەتكىزە وتىرىپ، IX استانا ەكونوميكالىق فورۋمىنا ناتيجەلى قاتىسقانى ءۇشىن العىس ءبىلدىردى. سەنات باسشىسى ر. ازيەۆەدوعا 2017 -جىلعى ماۋسىمدا استانادا «ەكسپو-2017» حالىقارالىق مامانداندىرىلعان كورمەنىڭ اشىلۋىنا ارنالعان ءىس- شارالار جايلى ايتىپ بەردى.
ق. توقايەۆ قازاقستاندىق دەپۋتاتتاردىڭ ۇكىمەتپەن جانە بيزنەسپەن ءوزارا ءىس- قيمىل جاساي وتىرىپ، ەلىمىزدىڭ دسۇ- عا مۇشە بولۋى جاعدايىنداعى ۇلتتىق ەكونوميكامىز ءۇشىن قاتەرلەرگە دە، مۇمكىندىكتەرگە دە تۇراقتى نەگىزدە تالداۋ جۇرگىزەتىنىن اتاپ ءوتتى. جاڭا پارلامەنتتىك سەسسيادا پارلامەنتتىڭ زاڭ شىعارۋ قىزمەتىندە باسەكەگە قابىلەتتىلىكتى ارتتىرۋ باسىم باعىت بولىپ قالا بەرمەك. مەملەكەت باسشىسىنىڭ تاپسىرماسى بويىنشا بارلىق قارجىلىق راسىمدەردىڭ اشىقتىعىن قامتاماسىز ەتۋ ماقساتىندا ءبىرىڭعاي سالىق جانە كەدەن كودەكسى قارالاتىن بولادى. مونوپولياعا قارسى سالا رەفورماسى دا جالعاسىن تاپپاق.
ق. توقايەۆ حالىقارالىق قىزىل كرەست كوميتەتىنىڭ پرەزيدەنتى پەتەر ماۋرەرمەن دە كەزدەستى. قازاقستان سەناتىنىڭ سپيكەرى ح ق ك ك- نىڭ قارۋلى قاقتىعىستار جاعدايىندا ادامداردىڭ ءومىرى مەن ابىرويىن قورعاۋ، گۋمانيتارلىق كومەك كورسەتۋدى قامتاماسىز ەتۋ، سونداي-اق حالىقارالىق گۋمانيتارلىق قۇقىقتىڭ نەگىزگى ەرەجەلەرىن ازىرلەۋ جانە ىسكە اسىرۋ جونىندەگى ايرىقشا ماڭىزدى قىزمەتىن اتاپ كورسەتتى. سەنات سپيكەرىنىڭ پىكىرىنشە، قازاقستاننىڭ 2017-2018 -جىلدارعا ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانۋىن، سونداي- اق قازاقستاندىق اسكەري قىزمەتشىلەردىڭ حالىقارالىق بىتىمگەرشىلىك ميسسيالارعا قاتىسۋى ارتا تۇسكەنىن ەسكەرە وتىرىپ، قازىرگى كەزەڭدە قازاقستان مەن ح ق ك ك- نىڭ ءوزارا ءىس- قيمىلى ەرەكشە ماڭىزعا يە بولۋدا.
ق. توقايەۆتىڭ ب ۇ ۇ ەۋروپالىق ەكونوميكالىق كوميسسياسىنىڭ اتقارۋشى حاتشىسى كريستيان فرييس باحپەن كەزدەسۋىندە ب ۇ ۇ- نىڭ وڭىرلىك جوبالارى تۋرالى، اتاپ ايتقاندا ورتالىق ازيا ەكونوميكالارى ءۇشىن ارنايى باعدارلاما (سپەكا) تۋرالى پىكىر الماسۋ بولدى. سەنات سپيكەرى سۋ رەسۋرستارىن باسقارۋ، ارال ءوڭىرىن وڭالتۋ، ەنەرگەتيكانى دامىتۋ پروبلەمالارىنا جانە باسقا دا ماسەلەلەرگە اڭگىمەلەسۋشىنىڭ نازارىن اۋداردى. ق. توقايەۆ وعان قازاقستاندا ەلىمىزدىڭ ەكونوميكاسى مەن قوعامدىق
تىنىس- تىرشىلىگىن جان- جاقتى جاڭعىرتۋعا باعىتتالعان «100 ناقتى قادام» ۇلت جوسپارىنىڭ ىسكە اسىرىلىپ جاتقاندىعى جايلى ايتىپ بەردى.
