قازاق ءانى پورتۋگاليا راديوسىنا قالاي تاپ بولدى؟ - كەسكىن

استانا. قازاقپارات - قازاق ەستراداسىنا ەرەكشە ستيلمەن كەلگەن، 80-90 -جىلداردى ەسكە تۇسىرەتىن كليپىن 21 -عاسىردىڭ ناعىز تازا مۋزىكاسىمەن ۇندەستىرە بىلگەن، رەسەيدى ءبىرىنشى ءانى شىققاننان-اق مويىنداتقان، امەريكا مەن نيۋ-يوركتە دارىنى ەرەكشە باعالانعان عالىمجان مولدانازار ەۋروپانىڭ قيىر باتىسىن باعىندىردى.

ونىڭ «اقپەن بىرگە» ءانى پورتۋگاليانىڭ راديوسىندا شىرقالدى. عالىمجان مولدانازاردىڭ الەۋمەتتىك جەلىدەگى پاراقشالارىندا كەشە تۇندە جاڭا ۆيدەو جۇكتەلدى. ول ۆيدەونى انشىگە پورتۋگالياداعى راديو قىزمەتكەرلەرى جىبەرگەن.

 2013 -جىلى جازىپ، كليپىن تۇسىرگەن «اقپەن بىرگە» اتتى ءانىن پورتۋگاليا جۇرتشىلىعى وتە جىلى قابىلداپتى. «عالىمجاننىڭ «اقپەن بىرگە» ءانى پورتۋگاليا راديوسىنا تاپ بولدى. عالىمجاندى ءسۇيىپ تىڭدايتىن ءبىر قىز پورتۋگلايادا، ليسسابوندا تۇرادى. ونىڭ جولداسى - پورتۋگاليا ازاماتى. سول جىگىتتىڭ دوسى راديودا جۇمىس ىستەيدى. ول راديودا «حالىقارالىق حيت» دەگەن ايدار بار، سول جانكۇيەر قىز راديوداعى دوستارىنا عالىمجاننىڭ ءانىن تىڭداتىپتى. ءان قاتتى ۇناسا كەرەك، ولار بىردەن ەفيرگە شىعارعان. ياعني، بۇل وتە كەزدەيسوق جايت بولدى. پورتۋگاليا راديوسىنا شىقساق ەكەن دەپ، ادەيى ەشكىمگە ءان جىبەرگەن جوقپىز. كەيىن پورتۋگاليادان بىزگە وسى ۆيدەونى جىبەردى»، - دەيدى عالىمجاننىڭ رەسمي وكىلى ەركەبۇلان.

قىزىلوردادا تۋىپ، الماتىدا ونەرىن ءوز بەتىمەن شىڭداعان عالىمجان اندەرىنىڭ ءسوزىن دە، اۋەنىن دە ءوزى جازادى. ءارى ءار ءانىن ەرەكشە ستيلمەن ارلەپ، كەز كەلگەن جاستىڭ تىڭدارمانىن باۋراپ الادى. اعا بۋىن ونىڭ كليپتەرىندەگى وتكەن عاسىردىڭ بەلگىلەرىن كورىپ، نوستالگياعا باستاپ، قازىرگى جاستار ونىڭ اۋەنىن، ونىڭ پافوستان مۇلدە ادا ولەڭ شۋماقتارى ءۇشىن جاقسى كورەدى.