الماتىدا اتىس سالدارىنان زارداپ شەككەندەردىڭ ءبىرى ەسىن جيدى
ال، جانساقتاۋ بولىمىنە تۇسكەن 4 ادامنىڭ ءبىرى ەسىن جيدى. بۇل تۋرالى بۇگىن الماتى قالالىق دەنساۋلىق ساقتاۋ باسقارماسىنىڭ باسپا ءسوز قىزمەتى حابارلادى.
«قازىرگى تاڭدا ەكى ادامنىڭ جاعدايى جاقسارىپ، بەيىندى بولىمشەگە اۋىستىرىلدى. دارىگەرلەر ولاردىڭ حالدەرىن ورتاشا اۋىر، تۇراقتى جانە بەلسەندى دەپ باعالاۋدا. ەمدەلۋشىلەر وزدەرى جۇرەدى جانە بارلىق ءتيىستى ەمدەردى قابىلداپ جاتىر»، - دەلىنگەن حابارلامادا.
الايدا ءتورت ادام ءالى دە جانساقتاۋ بولىمىندە جاتىر. ولاردىڭ ءبىرى ەسىن جيدى. وڭ وزگەرىستەر بايقالادى.
قازىر جانساقتاۋ بولىمىندە بارلىق ەمدەلۋشىلەرگە قارقىندى تەراپيا جۇرگىزىلىپ جاتىر.
جەتەكشى نەيروحيرۋرگ، نەيروينسۋلتولوگ، وفتالمولوگتاردىڭ قاتىسۋىمەن تۇراقتى تۇردە دارىگەرلەر كەڭەسى وتكىزىلىپ تۇرادى.
زارداپ شەككەندەر اۋرۋحانالارعا جەتكىزىلىسىمەن پسيحولوگتاردىڭ موبيلدى توبى جاساقتالدى. ولار قازا بولعاندار مەن جاراقات العانداردىڭ تۋعان-تۋىستارىنا پسيحولوگيالىق قولداۋ، قاجەت جاعدايدا تەگىن تۇردە ارنايى كومەكتەر كورسەتىپ جاتىر.
الماتى قالاسى اكىمىنىڭ تاپسىرماسى بويىنشا ەمدەلۋشىلەردىڭ تۋعان- تۋىستارىنا اۋرۋحاناعا كەلىپ، باۋىرلارىنىڭ جاعدايىن بىلۋگە بارلىق جاعداي جاسالعان.
ەستەرىڭىزگە سالا كەتەلىك، 2016 -جىلدىڭ 18- شىلدەسىندە الماتىدا اتىس سالدارىنان جاراقات العان ادامدار اۋرۋحانالارعا جەتكىزىلدى.
ولاردىڭ بەسەۋى الماتى قالالىق جەدەل شۇعىل كومەك كورسەتۋ اۋرۋحاناسىنا، تاعى ەكى ادام قالالىق ورتالىق كلينيكالىق اۋرۋحاناعا جاتقىزىلدى.
زارداپ شەككەندەر ءار ءتۇرلى دارەجەدە وق ءتيىپ جاراقات العان. ولارعا دەر كەزىندە بارلىق قاجەتتى تەكسەرۋلەر مەن دياگنوستيكا جاسالدى.
زارداپ شەككەندەردىڭ احۋالىنا ءتيىستى دياگنوز قويىلعان سوڭ، رەسپۋبليكالىق، قالالىق مەديتسينالىق مەكەمەلەر جانە ق ر ۇ ق ك اسكەري گوسپيتالىنان بارلىق كەرەكتى ماماندار: رەانيماتولوگ- انەستەزيولوگ، وتاشى، وفتالمولوگتار، تراۆماتولوگ، جاق سۇيەك- باس وتاشىلارىنىڭ قاتىسۋىمەن شۇعىل ەمدەر جاسالدى.
اۆتور: ايبوتا جاپپاربەرگەن
