الماتىدا لاڭكەستىك تۋرالى جالعان اقپارات تاراتقان ەكى تۇلعا قىلمىستىق جاۋاپكەرشىلىككە تارتىلدى
كريمينالدى پوليسيانىڭ دەرەكتەرى بويىنشا، دايەكسىز مالىمەتتەردى بەلسەندى تاراتۋشىلاردىڭ اتى- جوندەرى سوتقا دەيىنگى ءوندىرىس اياسىندا جۇرگىزىلىپ جاتقان كەشەندى جەدەل شارالار ناتيجەسىندە انىقتالدى.
«قوعامدىق ۇرەي تۋعىزعان ارانداتۋشىلاردىڭ ءبىرى - 1995 -جىلى تۋعان چ. ەسىمدى ازاماتشا. ول - جوعارى وقۋ ورىندارىنىڭ ءبىرىنىڭ ستۋدەنتى. ول الەۋمەتتىك جەلىدەگى ءوزىنىڭ حابارلامالارىندا «سيتي پليۋس» ساۋدا ۇيىندە ادامداردىڭ كەپىلدىككە الىنعاندىعى، قۇربان بولعانداردىڭ بار ەكەندىگى جايىندا قايتا- قايتا تاباندىلىقپەن مالىمەت تاراتقان. تاعى ءبىر جالعان مالىمەت تاراتۋشى - 1993 -جىلى تۋعان ازامات. ول كوممۋنيكاتسيالىق جەلىلەردى پايدالانا وتىرىپ، قالانىڭ تومەنگى جاعىندا قارۋلانعان 100 ادامنىڭ ادامداردى قىرىپ جاتقانى جايىندا ادەيى جالعان اقپارات تاراتقان.
ەكى تۇلعا دا ۇستالدى. قازىر ولاردان ق ر ق ك 274- بابىنىڭ 2- تارماعىندا كورسەتىلگەن قىلمىستار نىشانى بويىنشا سوتقا دەيىنگى تەرگەۋ اياسىندا جاۋاپ الىنىپ جاتىر. جاقىن ۋاقىتتا ءىس جۇرگىزۋ ءراسىمى بويىنشا كۇدىكتىلەرگە قاتىستى بۇلتارتپاۋ شاراسى تاعايىندالادى» ، - دەدى الماتى قالالىق ءىىد رەسمي وكىلى سالتانات ازىربەك.
سونىمەن قاتار، پوليتسيا بولىمىندەگىلەر كوپە- كورىنەۋ جالعان اقپارات تاراتقان باسقا دا تۇلعالاردى انىقتاۋ بويىنشا جەدەل- ىزدەستىرۋ شاراسىنىڭ جالعاسىپ جاتقاندىعىن ايتتى.
«ازاماتتاردى تاعى دا زاڭ تالاپتارىن ساقتاۋعا شاقىرامىز. ق ر قىلمىستىق كودەكسىنىڭ جاڭا رەداكسياسىندا ب ا ق نەمەسە باسقا دا اقپاراتتىق- كوممۋنيكاتسيالىق جەلىلەردى پايدالانا وتىرىپ قاساقانا جالعان اقپارات تاراتقاندىق ءۇشىن جاۋاپكەرشىلىك قاراستىرىلعان. وسىعان بايلانىستى، ءاربىر ازامات الەۋمەتتىك جەلىلەردە بولسىن، باسقا دا رەسۋرستاردا بولسىن ءوزىنىڭ ويىن، پىكىرىن، پايىمىن، ۋاجدەرىن اقىلعا سالىپ بارىپ جاريالاۋى ءتيىس.
سوندىقتان، دەرەككوزى بەلگىسىز، كۇماندى مالىمەتتەردى تاراتۋعا جاعدايلار، العىشارتتار جاساماۋعا شاقىرامىز. تەك رەسمي اقپاراتتاردى عانا پايدالانۋ قاجەت» ، - دەدى مايور س. ازىربەك.
