سانكت-پەتەربۋرگتە «استانا بالەت» تەاترى ونەر كورسەتتى

استانا. قازاقپارات - رەسەيدىڭ سانكت-پەتەربۋرگ قالاسى ەكى اي بويى الەمنىڭ ۇزدىك شىعارماشىلىق ۇجىمدارىن قابىلدادى.

اتى اڭىزعا اينالعان مارينسك تەاترىندا 160 تان استام سپەكتاكلدەر مەن كونسەرتتەر قويىلدى، دەپ حابارلادى www.24.kz.

«اق ءتۇننىڭ جۇلدىزدارى» اتتى مۋزىكالىق مارافون دوڭگەلەنگەن دۇنيەدەگى ەڭ تانىمال حالىقارالىق فەستيۆالدەرىنىڭ ءبىرى. مۇندا پلاسيدو دومينگو، ۋليانا لوپاتكينا جانە ديانا ۆيشنيەۆا سەكىلدى بەلگىلى تۇلعالار ونەر كورسەتتى.

ولاردىڭ اراسىندا قازاقستاندىق «استانا بالەت» تەاترى دا بار. بىرنەشە عاسىرلىق تاريحى بار ماريينسك تەاترىندا «استانا بالەت» ۇجىمى وسىمەن ءۇشىنشى رەت ونەر كورسەتىپ وتىر. «اركەز ساحناعا شىعار الدىندا قۇددى ءبىر ەمتيحان تاپسىرىپ وتىرعاندايمىز»، - دەيدى بيشىلەر. ونەر يەلەرى بۇل جولى دا قوبالجۋدا.

«قاتتى قوبالجىپ تۇرمىن. مۇنداعى ساحنانىڭ اتى اڭىزعا اينالعان. سوندىقتان كورەرمەن الدىنا شىعاردا مىندەتتى تۇردە مورالدىق تۇرعىدا دايىندالامىز. قويىلىمعا جارتى ساعات قالعاندا جەتەكشىمىز ءبارىمىزدى جيناپ، ءبىزدى شابىتتاندىرۋعا تىرىسادى»، - دەدى بالەرينا نازەركە احمەت.

استانالىق تەاتردىڭ قويىلىمىن تاماشالاۋعا سانك-پەتەربۋرگ قالاسىنىڭ تۇرعىندارى دا كەلگەن. كورەرمەندەردىڭ قاتارىندا الەمنىڭ تۇكپىر-تۇكپىرىنەن كەلگەن تۋريستەر، بالەتتانۋشىلار جانە تەاتر سىنشىلارى بار. زالدا ينە شانشار جەر جوق. بيلەتتەر ساتىلىپ كەتكەن.

بۇل جولى «استانا بالەت» ۇجىمى ەۋروپالىق حورەوگرافتار قويعان سپەكتاكلدى كوپشىلىككە ۇسىندى. «استانا بالەت» كورەرمەندەردى تاڭعاجايىپ بي الەمىنە جەتەلەيدى. جەرلەستەرىمىز ۇسىنعان اسەرلى «گايا» سپەكتاكلى تابيعاتتىڭ ءتورت قۇدىرەتى تۋرالى باياندايدى.

«كوكتە سامعاپ جۇرگەندەي اسەر قالدىرعىمىز كەلدى. بۇل ويىمىز جۇزەگە اسقان سەكىلدى. ءبىزدىڭ حيكايامىز الەمدەگى ۇيلەسىمدىك تۋرالى باياندايدى. تابيعاتتى كۇتۋ كەرەك دەگەن وي تاستايدى كورەرمەنگە. «استانا بالەت» ۇجىمىمەن بىرگە جۇمىس ىستەۋ ماعان قاتتى ۇنادى. بۇل ءبىزدىڭ بىرگە قويعان سوڭعى سپەكتاكلىمىز ەمەس»، - دەپ ءوز ويىمەن ءبولىستى. قويۋشى حورەوگراف ريكاردو امارانتە (بەلگيا).

ءسال ۇزىلىستەن كەيىن قازاقستاندىق ارتىستەر «كلەوپاترا» بالەتىن كورەرمەن نازارىنا ۇسىندى. ءبىراق بۇل جولى ونەر يەلەرى بىزگە ۇيرەنشىكتى ماحاببات حيكاياسىن ەمەس، پاتشايىم ءومىرىنىڭ كوپشىلىك بىلە بەرمەيتىن وقيعاسىن پاش ەتتى. قويىلىمدا كلەوپاترا مەن كىشى ءسىڭلىسى ارسينويانىڭ تاققا تالاسۋ ءساتى كورسەتىلەدى.

«مەن بۇل قىزدارمەن بىرگە جۇمىس ىستەي باستاعاندا سۇلۋلىق تۋرالى اڭىز ويلاپ تاپقىم كەلدى. اسەمدىكتىڭ ەتالونى كىم دەسە، بارلىعى، ارينە، كلەوپاترا دەپ جاۋاپ قايتارادى. ءبىراق ءبىز قويىلىمدى ەر ادامدارسىز جاساۋعا بەل بۋدىق»، - دەدى قويۋشى حورەوگراف نيكولاي ماركەلوۆ (رەسەي).

«استانا بالەت» ۇجىمىنىڭ ماريينسكىدەگى العاشقى ونەر كورسەتۋى رەسەيلىك سىنشىلاردىڭ ءالى ەسىندە. ۆاگانوۆا اتىنداعى ورىس بالەت اكادەمياسىنىڭ پروفەسسورى ولگا روزانوۆانىڭ ايتۋىنشا، ەلوردالىق تەاتر ارتىستەرى الەمنىڭ ەڭ ۇزدىك ساحنالارىندا ونەر كورسەتۋگە لايىق.

«بۇگىنگى كەش وتە قىزىقتى ءوتتى. قازاق ترۋپپاسى تاماشا ونەر كورسەتتى. ەسەسىنە، بۇل قويىلىمدا تەك ايەل ادامدار عانا وينادى. ولار ەر ازاماتتار تاراپىنان قولداۋ كورگەن جوق. ءبارىن وزدەرى بيلەپ شىقتى. مەنىڭشە، سپەكتاكلدى الەمنىڭ كەز كەلگەن ساحناسىندا كورسەتۋگە بولادى»، - ا. يا. ۆاگانوۆا اتىنداعى ورىس بالەت اكادەمياسىنىڭ پروفەسسورى ولگا روزانوۆا.

استانالىق تەاتردىڭ ەرەكشەلىگى سول، مۇنداعى ارتىستەر كەز كەلگەن ەكسپەريمەنتكە دايىن. ءتۇرلى جانرداعى سپەكتاكل قويىپ، ءوزىنىڭ كورەرمەندەرىن قايران قالدىرا الادى.