جۇمىسسىز قازاقستاندىقتار كەزەككە تۇرىپ، الەۋمەتتىك تولەم الۋىنا بولادى

استانا. قازاقپارات - ەلىمىزدە مىندەتتى الەۋمەتتىك ساقتاندىرۋ جۇيەسىنە قاتىساتىن قازاقستاندىقتار ءۇشىن جۇمىستان شىعىپ قالعان جاعدايدا الەۋمەتتىك تولەم الۋ جانە جۇمىسسىز ازامات رەتىندە تىركەلۋ ءراسىمى جەڭىلدەتىلدى.

ەندى بۇل ەكى قىزمەتتى دە جەرگىلىكتى جۇمىسپەن قامتۋ ورتالىعىنا بارىپ، ءبىر مەزگىلدە الۋعا بولادى.

بۇرىن جۇمىسىنان ايىرىلعان ادام الەۋمەتتىك تولەمدى راسىمدەۋ ءۇشىن الدىمەن جۇمىسسىز ازامات رەتىندە تىركەلىپ، ەسەپكە تۇرۋعا جۇمىسپەن قامتۋ ورتالىعىنا باراتىن، سودان كەيىن عانا الەۋمەتتىك تولەم الۋعا زەينەتاقى تولەۋ جونىندەگى مەملەكەتتىك ورتالىعىنا

(ز ت م و) نەمەسە حالىققا قىزمەت كورسەتۋ ورتالىعىنا (ح ق ك و) باراتىن.

«ازاماتتارعا ارنالعان ۇكىمەت» مەملەكەتتىك كورپوراتسياسى» كوممەرتسيالىق ەمەس اكسيونەرلىك قوعامىنىڭ فيليالى - ز ت م و ديرەكتورىنىڭ ورىنباسارى سەرىكحان سابىرجانوۆتىڭ ايتۋىنشا، مەملەكەتتىك ورگانداردىڭ اقپاراتتىق جۇيەلەرىن ىقپالداستىرۋ ناتيجەسىندە قاعاز جۇزىندەگى قۇجات اينالىمى تولىعىمەن جويىلدى.

«ەندى ءوتىنىشتى قابىلداۋ كەزىندە جەكە كۋالىك پەن قارجىنى اۋدارۋ ءۇشىن بانك شوتى عانا تالاپ ەتىلەدى. قالعان مالىمەتتەردىڭ ءبارى جەكە تۇلعالاردىڭ مەملەكەتتىك مالىمەتتەر بازاسىنان ەلەكتروندىق ۇكىمەت شليۋزى ارقىلى جانە ەڭبەك نارىعى بازاسىنان الىنادى» - دەيدى س. سابىرجانوۆ.

ايتا كەتسەك، جۇمىسىن جوعالتقان جاعدايداعى الەۋمەتتىك تولەمدى 4 ايعا دەيىن الۋعا بولادى. ەگەر ادام قىسقارتىلسا، جۇمىس ورنى تاراتىلسا نەمەسە ءوندىرىس كولەمىنىڭ ازايۋىنا بايلانىستى جۇمىستان شىققان جاعدايدا، الەۋمەتتىك تولەم 6 ايعا دەيىن تاعايىندالۋى مۇمكىن.

جىل باسىنان بەرى ەسەپكە قويۋعا جانە الەۋمەتتىك تولەم تاعايىنداۋعا بارلىعى 2720 جۇمىسسىز ءوتىنىش بەردى.