رەسەيلىك جەڭىل اتلەتتەر ريو وليمپياداسىنا قاتىسپايدى

استانا. قازاقپارات - رەسەيدىڭ جەڭىل اتلەتيكا بويىنشا قۇراماسى ريو- دە- جانەيروداعى جازعى وليمپياداعا قاتىسپايدى.

مۇنداي ۇكىمدى لوزانناداعى سپورتتىق تورەلىك سوتى شىعارعان. قۇزىرلى مەكەمە وسى ماسەلەگە بايلانىستى بەرىلگەن رەسەيدىڭ وليمپيادالىق كوميتەتى مەن رەسەيلىك 67 جەڭىل اتلەتتىڭ شاعىمىن قابىلداماي تاستادى. ولار دوپينگتى قولدانباعانىنا جانە ويىندارعا قاتىسۋدان نەگىزسىز الاستاتىلعانىنا حالىقارالىق ورگاننىڭ كوزىن جەتكىزە المادى.

ەستەرىڭىزگە سالا كەتەيىك، وتكەن جىلدىڭ قاراشاسىندا جەڭىل اتلەتيكا فەدەراتسيالارىنىڭ حالىقارالىق قاۋىمداستىعى رەسەي قۇراماسىن دوپينگكە قاتىستى جەلەۋمەن جارىستاردان شەتتەتكەن ەدى. ال وسى ايدىڭ باسىندا رەسەيدىڭ وليمپيادا كوميتەتى بۇل شەشىمگە قارسى سپورتتىق تورەلىك سوتىنا ارىز تۇسىرگەن بولاتىن.

www.24.kz