جاس جىرشىلار جەتىسۋ جەرىندە جينالدى

استانا. قازاقپارات - تالدىقورعاندا «تاريحقا تاعزىم» اتتى رەسپۋبليكالىق جاس جىرشىلار بايقاۋى ءوتىپ جاتىر.

وعان ەلىمىزدىڭ 6 وڭىرىنەن كەلگەن 15 جىرشى قاتىسىپ، ونەر سايىسىنىڭ كورىگىن قىزدىرۋدا. قاتىسۋشىلار پوەما مەن ەپوستىق جىردان 2 ءۇزىندى ورىنداۋى ءتيىس. ونىڭ بىرەۋى جەتىسۋ وڭىرىنەن شىققان جىر سۇلەيلەرىنىڭ تۋىندىسى بولۋى شارت. مىسالى، قابان جىراۋدىڭ، ءسۇيىنباي مەن جامبىلدىڭ شىعارماسىن ورىنداۋعا بولادى.

ەكىنشىسى پاتريوتتىق مازمۇندا بولۋى كەرەك. بايقاۋدىڭ باستى ماقساتى -  جاستاردى ۇلتتىق ونەرگە باۋلىپ، جىرشىلار مەكتەبىن قالىپتاستىرۋ.

تولەۋجان عۇماروۆ، قازىلار القاسىنىڭ مۇشەسى:

- ءبىرىنشى رەت ءوتىپ جاتقاننان كەيىن كەيبىرەۋلەر جىر مەن تەرمەنى شاتاستىرىپ الىپ جاتىر. جىر دەگەنىمىز بەلگىلى ءبىر اڭىزدان، تاريحي وقيعادان ءۇزىندىنى جىرلاپ جەتكىزۋ كەرەك. سوندىقتان مۇندا كاسىبي ماماندار وتىر. قايسىسى جىردى تولىق ءتۇسىندى، قايسىسى تولىق تۇسىنە المادى، بايقاۋ سوڭىندا ساراپقا تۇسەتىن بولادى. سول بويىنشا جۇلدەگەرلەر انىقتالادى.

www.24.kz