الەكسەي لۋسەنكو: وليمپيادا ويىندارىنا دايىندىعىم «سان سەباستيان» جارىسىندا جالعاسادى

استانا. قازاقپارات - جازعى وليمپيادا ويىندارىندا ۆەلوسپورتتان ەل نامىسىن قورعايتىن الەكسەي لۋسەنكو اقپارات قۇرالدارىنا بەرگەن سۇحباتىندا ريو وليمپياداسىنا دايىن ەكەندىگىن ايتتى.

بەرن مەن فيناۋت- ەموسسنو قالاشىقتارىنىڭ اراسىندا ءوتىپ جاتقان 184 شاقىرىمعا سوزىلعان جارىستا لۋسەنكو كوماندالىق ارىپتەسى تانەل كانگەرپەن بىرگە العا ۇزاعان توپتىڭ قاتارىندا بولىپ، فابيو ارۋدىڭ جالپى ەسەپتە سەگىزىنشى ساتىعا كوتەرىلۋىنە كومەكتەستى.

الەكسەي لۋسەنكو سۇحباتىندا استانا شاباندوزدارىنىڭ كەزەڭدىك جارىستا جەڭەسكە جەتە الماعان سەبەبىن بىلاي ءتۇسىندىردى. «مارەدەن ۇزاعان كەزدەن الدىڭعى توپقا قوسىلىپ، پەلوتوننان ۇزاپ كەتكىسى كەلگەندەر كوپ بولدى. العاشقى ءبىر جارىم ساعات شاباندوزدار اراسىندا تالاسپەن ءوتتى.

 العاشقى تاۋدىڭ ەتەگىنە كەلگەندە ارىپتەسىم تانەل كانگەرت ەكەۋمىزدىڭ جولىمىز بولدى. ءبىراق العا ۇزاعان توپ كوپ ۇزاماي ەكىگە ءبولىنىپ كەتتى. سوندىقتان، ءبىز «Direct Energie» مەن «ۆ م س» كومانداسىنىڭ ەكى وكىلىمەن قوسىلىپ جىلدامدىعىمىزدى ۇدەتۋگە شەشىم قابىلدادىق. ناتيجەسىندە، 30-40 شاقىرىمداي العا شىقتىق. پەلوتوننان ۇزاپ كەتۋ ءۇشىن مەن كوپ كۇش جۇمسادىم، ال كەزەڭ اياعىنا قاراي تانەل كانگەرتكە كومەكتەسكەندى دۇرىس دەپ تاپتىم. سوندىقتان، ارتقا شەگىنىپ، كوماندا كاپيتانى فابيو ارۋعا كومەكتەسۋىم كەرەك بولدى. فابيو كەلە جاتقان نەگىزگى توپتا سارى جەيدە يەگەرى كريس فرۋممەن قوسا جەكە ەسەپتە جەڭىسكە تالاسقان وزگەدە شابادوزدار بولاتىن»، - دەدى ول.

سونداي-اق، ول كوماندا كاپيتانى فابيو ارۋدىڭ پاريجگە دەيىنگى كەزەڭدەردە ۋاقىت ايىرماشىلىعىن قىسقارتىپ، جەڭىمپازدار قاتارىنان كورىنۋگە مۇمكىندىگى مول ەكەندىگىن دە ايتتى. وليمپيادا ويىندارىنا باحتيار قوجاتايەۆپەن بىرگە ۇلتتىق قۇراما ساپىنا ىرىكتەلگەن الەكسەي لۋتسەنكو تۋر دە فرانستان كەيىن «سان سەباستيان» جارىسىنا قاتىسىپ، ريوعا اتتانادى.

اۆتور: كۇنسۇلتان وتارباي