ەرەۆاندا شەرۋگە شىققاندار مەن پوليتسيا اراسىندا قاقتىعىس بولدى

استانا. قازاقپارات - ەرەۆاندا قارۋلى توپ بەكىنىپ العان پوليتسيا بولىمشەسىنىڭ عيماراتى جانىنا جينالعان شەرۋشىلەر ءتارتىپ ساقشىلارىنا تاس اتتى.

ولارعا قارسى قۇقىق قورعاۋشىلار جارىق-شۋلى جانە ءتۇتىن گراناتالارىن پايدالاندى. قوس تاراپتان 50 دەن استام ادام زارداپ شەكتى.

كەشە، 20- شىلدەدە كەشكى مەزگىلدە ەرەۆاندا قارۋلى توپ بەكىنىپ العان پوليتسيا بولىمشەسىندە ورىن العان وقيعانىڭ كۇشپەن شەشىلۋىنە قارسىلىق تانىتقان ازاماتتار جينالا باستادى.

شەرۋشىلەر ۇيىمداستىرعان قوعامدىق تالقىلاۋدا پوليتسيا بولىمشەسىندە بەكىنىپ العان قارۋلى توپقا تاماق جەتكىزۋ جايى كوتەرىلدى. كەيىن ولار تاماقتى جەتكىزۋ ءۇشىن پوليتسيادان رۇقسات سۇراعان. الايدا پوليتسيا قىزمەتكەرلەرى ەرەكشە قورعالاتىن اۋماققا قاۋىپسىزدىكتى ساقتاۋ ماقساتىندا بوگدە ازاماتتاردىڭ كىرۋىنە تىيىم سالىناتىنىن جەتكىزدى. وسىعان بايلانىستى شەرۋشىلەر وزدەرىنىڭ قارسىلىقتارىن قىزۋقاندى ءبىلدىرىپ، جەكەلەگەن ادامدار پوليتسيا شەبىنە تاس اتا باستادى.

ۋشىعىپ بارا جاتقان جاعدايدى ارا-تۇرا وپپوزيتسيالىق دەپۋتات نيكولا پاشينيان تىنىشتاندىرۋعا تىرىستى. ول شەرۋشىلەردى سابىرعا شاقىرىپ، جاعدايدى ۋشىقتىرماۋدى سۇرادى. ونىڭ اراشا تۇسۋىنە قاراماستان، پوليتسيا مەن جينالعاندار اراسىندا كيكىلجىڭ بولدى. قىزۋقاندى توپتى باسۋ ءۇشىن ن. پاشينيانعا كومەككە ءدىني قىزمەتكەرلەر، مادەنيەت جانە ونەر قايراتكەرلەرى كەلە باستادى. ولار پوليتسيا مەن جينالعاندار اراسىندا تۇرىپ، حالىقتى تىنىشتىققا شاقىردى، وسىلايشا قاقتىعىستى بولدىرماۋعا ارەكەت ەتتى.

وسى ارالىقتا شەرۋشىلەر پوليتسيا شەبىنىڭ ماڭىندا قوقىس جاشىكتەرىنەن بارريكادالار تۇرعىزدى. وقيعا ورنى ءتۇنى بويى شيەلەنىستە بولدى.

تاڭعا جاقىن، 21- شىلدەدە پوليتسيا شەرۋشىلەرگە وقيعا ورنى ماڭىنداعى جولدا قوزعالىستى قالپىنا كەلتىرۋدى سۇرادى. بىرەر مينۋت كۇتكەن پوليتسيا بۇيرىققا مويىنسۇنباعان بىرنەشە ازاماتتى ۇستاپ اكەتتى. جەرگىلىكتى ب ا ق- تىڭ مالىمەتتەرى بويىنشا، ناتيجەسىندە 30 عا جۋىق ادام ۇستالعان. وسىدان سوڭ وقيعا ورنىنداعى جاعداي تۇراقتالدى.

ەسكە سالا كەتەيىك، 17- شىلدە كۇنى قارۋلى توپ ەرەۆان قالاسىندا ەرەبۋني اۋدانىنىڭ پوليتسيا بولىمشەسىن باسىپ الىپ، بىرنەشە ادامدى كەپىلگە العان بولاتىن. قارۋلى توپ مۇشەلەرى قاماۋعا الىنعان جيرايرا سەفيلياندى بوساتۋدى تالاپ ەتكەن. ارنايى وپەراتسيا بارىسىندا كەپىلدەن 5 ادامدى بوساتۋ مۇمكىن بولدى. تاعى ءتورت ادام قارۋلى توپتىڭ قولىندا قالىپ وتىر. ارميان ارنايى قىزمەتى مەن قارۋلى توپ اراسىندا كەلىسسوزدەر ءالى جالعاسۋدا.

اۆتور: جاسۇلان جولدىبايەۆ