كەلىننەن قاشقان شال

نۇر- سۇلتان. قازاقپارات - الپىسىنشى جىلدارى ءبىزدىڭ اۋىلدا وماش دەگەن كىسى بولدى. ءوزىنىڭ ازداپ مولدالىعى جانە ەلدىڭ كەمشىلىگىن ايتىپ جۇرەتىن ادەتى بار بولاتىن. ەلدىڭ كەمشىلىگىن تۇگەندەپ ايتىپ جۇرگەن ادامدى كىم جاقسى كورسىن.

بىردە جەزدەسىنىڭ، ياعني اپكەسىنىڭ بالاسى اسكەري بورىشىن وتەپ، اۋىلعا قايتقاندا ماشا دەگەن ورىس قىزعا ۇيلەنىپ كەلەدى. ءبىر ءۇيدىڭ جالعىز بالاسى كەلىن تۇسىرگەن سوڭ اكەسى بولاتحان اتاي توي جاساپ، قۋانىشقا بولەنەدى. اۋىلدى جەردىڭ ادەتى بويىنشا جاس كەلىنگە ورامال سالىپ، سالەم جاساتىپ، شاي قۇيعىزىپ، ەرتەڭگىسىن ەسىكتىڭ الدىن سىپىرتىپ دەگەندەي جۇمىستارعا اپاسى ۇيرەتە باستايدى. اپاسىنىڭ تاربيەسىن جاقسى قابىلداعان ماشا كەلىندى ەل جاقسى كورەدى. ءبىر كۇنى تاڭەرتەڭ ماشا كەلىن سيىرلارىن تابىنعا قوسىپ كەلە جاتقان وماش اتاسىن بايقاماي، سالەم سالۋدى ۇمىتىپ كەتەدى. وماش دەرەۋ اپكەسى مەن جەزدەسىنە كەلىپ «كەلىن ماعان سالەم سالمادى، سەندەر ءجوندى تاربيە بەرمەي جۇرسىڭدەر» - دەپ ەسكەرتۋ جاساپ كەتەدى.

- ومەكە! كەلىن بايقاماعان شىعار، بۇدان بىلاي ساعان مىندەتتى تۇردە سالەم سالىپ تۇراتىن بولادى، دەپ جەزدەسى وماشتى شىعارىپ سالادى. سول كۇنى ماشا كەلىنگە:

- ماشا شىراعىم، جاڭاعى كەلگەن وماش وتانوۆيچتى كورگەن جەردە مىندەتتى تۇردە توقتاتىپ الىپ سالەم سالىپ تۇر، ول دا سەنىڭ ءبىر اتاڭ بولا- دى، دەپ كەلىنگە قالاي سالەم سالۋدى ۇيرەتىپ قويادى. اتاسىنىڭ ءسوزىن تۋرا تۇسىنگەن ماشا كەلىن ەرتەڭگىسىن كوپپەن بىرگە سيىر ايداپ كەلە جاتقان ومەكەڭدى داۋىستاپ توقتاتىپ الىپ:

- اماش اتانوۆيچ زدراۆستۆۋيتە، - دەپ ءۇش رەت ءيىلىپ سالەم سالادى. وماشتى اماش دەپ ونىڭ ۇستىنە اكەسىنىڭ وتان دەگەن اتىن بادىرايتىپ تۇرىپ اتان دەپ سالەم سالعان كەلىننەن مولدەكەڭ تۇرا قاشادى. جانىنداعى ادامداردىڭ ءبارى ءماز بولىپ كۇلىپ تاراسادى. مۇنداي ماسقاراعا شىداماعان ومەكەڭ ايداپ وتىرىپ اپكە- جەزدەسىنە كەلەدى. اتاسى مەن اپاسىنا ەرتەڭگى شايىن بەرىپ وتىرعان ماشا كەلىن قارعىپ تۇرىپ:

- اماش اتانوۆيچ، زدراستۆۋيتە! دەپ تاعى دا ءۇش رەت سالەم سالادى. ومەكەڭ شايعا قاراماي بۇرىلا سالىپ ۇيدەن شىعىپ كەتەدى. اتاسى ءماز. تۇككە تۇسىنبەگەن كەلىن اتاسى مەن اپاسىنا قارايدى. اتاسى:

- اينالايىن زولوتوي كەلىنىم، سەن وتە دۇرىس جاسادىڭ، دەپ كەلىنىنىڭ ماڭدايىنان يىسكەيدى. بار پالەنى جاساپ جۇرگەن شالى ەكەنىن تۇسىنگەن اپاسى دا ءماز بولىپ جەتىسىپ قالادى. ەرتەسىندە ومەكەڭ ا پ كەسىنە كەلىپ:

- اپكە، بۇدان بىلاي كەلىن ماعان سالەم سالماي- اق قويسىنشى، - دەپ جالىنادى. سودان باستاپ ومەكەڭ كەلىنگە كورىنبەي سيىرىن باسقا كوشەمەن ايدايتىن بولىپتى.

بەركىن اكەبايەۆ

«ايقىن»