بريتاندىق ستۋدەنت جولاقىسىن تولەۋگە ارنالعان مانيكيۋر ويلاپ تاپتى

استانا. قازاقپارات - كۇندەلىكتى اۆتوبۋسقا مىنگەن كەزدە ءبىز ءۇشىن تيىن-تەبەندى سىلدىرلاتىپ جاتقاننان وتكەن قولايسىز نارسە جوق.

ال بريتانيانىڭ Central Saint Martins كوللەدجىندە وقيتىن ديزاينەرلىك فاكۋلتەت ستۋدەنتى ليۋسي دەۆيس ايەلدەر ءۇشىن بۇل ماسەلەنى وزىنشە شەشىپتى، دەپ جازادى 24.kz.

ستۋدەنت قىز بۇل ءۇشىن لوندوندا كەڭىنەن قولدانىلاتىن Oyster جولاقىسىن تولەۋ كارتاسىنىڭ ارنايى ءچيپىن سۋىرىپ الىپ، ونى ءوزى ويلاپ تاپقان مانيكيۋردىڭ اراسىنا كىرىكتىرگەن. ەندى مۇنداي مانيكيۋر جاساتقان ايەل قوعامدىق كولىككە ءوتۋ جولىنداعى تۋرنيكەتكە ساۋساقتارىن تيگىزسە بولعانى، قالاعان جەرىنە دەيىن كولىككە وتىرىپ كەتە بەرەدى.

«مەن ويلاپ تاپقان بۇل مانيكيۋر بۇكىل الەمنىڭ كادەسىنە اسسا ەكەن. سەبەبى وسى مانيكيۋردى ويلاپ تابۋ كەزىندە مەن جەر-جاھانعا كەڭىنەن كوز جۇگىرتىپ، ءبىراز نارسەنى سارالادىم. سونىڭ ارقاسىندا ادامنىڭ ءومىرىن قولايلى ەتىپ وزگەرتەتىن ءونىم تۋرالى وي باسىما كەلدى»، - دەيدى ليۋسي دەۆيستىڭ ءوزى.

قازىر ول لوندونداعى قوعامدىق كولىكتىڭ رەسمي وكىلدەرىمەن سويلەسىپ تە قويىپتى. ەندى كوپ ۇزاماستان، بريتاندىق قىز-كەلىنشەكتەر مەترو نەمەسە اۆتوبۋستا ءجۇرۋ اقىسىن تىرناقپەن تولەيتىن بولۋى مۇمكىن، دەپ جازادى Metro.