قازاقستاندىق اسكەري قىزمەتشىسى ارميا حالىقارالىق ويىندارعا قاتىسۋ ءۇشىن رەسەيگە اتتاندى
ولار ەلىمىزدىڭ نامىسىن الداعى ويىنداردىڭ «رەمبات»، «قارۋ شەبەرى»، «اۆتوبروندى تانكتى تەحنيكا شەبەرلەرى» اتتى ءۇش بايقاۋدا قورعايتىن بولادى. اتالعان بايقاۋلاردا ءبىرقاتار سىننان وتۋگە تۋرا كەلەدى. «رەمبات» - بۇل تەحنيكا مەن قارۋ-جاراققا قىزمەت كورسەتۋ جانە جوندەۋ بويىنشا شەبەرحانالاردىڭ سايىسى. مۇندا ءبىرىنشى ورىنعا كۇش سىناسۋدا قاتىسۋشىلارعا جەكە جارىستا، اتىس دايارلىعىندا، اسكەري-سپورتتىق كەزەڭ مەن ارالاس ەستافەتادا وزدەرىنىڭ بارلىق شەبەرلىكتەرىن پاش ەتۋ قاجەت.
«قارۋ شەبەرى» - قارۋ-جاراق جوندەۋ ۆزۆودتارىنىڭ سايىسى. كوماندالاردى ءۇش كەزەڭ كۇتىپ تۇر. اتاپ ايتقاندا، 122-م م د-30ا تارتىلاتىن گاۋبيتسانى جوندەۋ، 23-م م ز ۋ-23 زەنيتتىك قۇرىلعىسىن جوندەۋ، قارۋ بياتلونى جانە شەشۋشى ەستافەتا. «اۆتوبروندى تانكتى تەحنيكا شەبەرلەرى» - اۆتوموبيل جۇرگىزۋشىلەرىنىڭ سايىسى.
اسكەري جۇرگىزۋشىلەر شەكتەۋلى وتۋلەر بويىنشا جۇرگىزۋدە، كەدەرگىلەردى، قورشاۋلار مەن سۋ بوگەتتەرىن ەڭسەرۋدە، شەكتەۋلى وتۋلەر بويىنشا جارتىلاي تىركەمەلەردى تارتۋدا، سونداي-اق، سوڭعى كوماندالىق ەستافەتادا سىنالادى. اتالعان بايقاۋلارعا قاتىسۋ ءۇشىن بەلگىلەنگەن كوماندالار اسكەري بولىمدەر، وڭىرلىك قولباسشىلىقتار مەن قۇرلىق اسكەرلەرى دەڭگەيىندە ىرىكتەۋدەن وتكەندەرىن ايتا كەتكەن ءجون. ولاردىڭ قۇرامىنداعىلار - ۇزدىك جۇرگىزۋشىلەر، تەحنيكتەر مەن شەبەرلەر.
جالپى العاندا، وسى جىلى قازاقستاننىڭ قارۋلى كۇشتەرى ارميا حالىقارالىق ويىندارىنىڭ 23 بايقاۋىنىڭ 21 ىنە قاتىسادى. وسىلايشا، كوماندالار بارلىق ويىن تۇرلەرىندە ۇسىنىلادى. العاشقى رەت ونەر كورسەتەيىن دەپ وتىرعان اسكەري قىزمەتشىلەرگە ۇلكەن ءۇمىت ارتىلىپ وتىر. تانكىشىلەردىڭ، اسكەري ۇشقىشتار مەن تەڭىزشىلەردىڭ اتالمىش سايىستارعا قاتىسۋداعى مول تاجىريبەلەرى «تانك بياتلونى»، «اۆيادارتس»، «تەڭىز كۋبوگى» بايقاۋلارىندا جۇلدەلى ورىندارعا ۇمىتتەنۋگە مۇمكىندىك بەرەدى.
