ەگيپەتتى سوڭعى ءجۇز جىلدا بولماعان تابيعي اپات جايلادى

استانا. قازاقپارات - جەرگىلىكتى بيلىك وعان كليماتتىڭ وزگەرۋى سەبەپ دەگەن پىكىر ايتىپ وتىر.

الايدا حالىقتىڭ وعان سەنگىسى جوق. مىسال رەتىندە ايتار بولساق، ەگيپەتتىڭ سولتۇستىگىندەگى داكاحليا پروۆينسياسىندا ورنالاسقان ەل-اراب ماگۋب دەگەن اۋىل بار. جەرگىلىكتى حالىق سۋعا ءزارۋ. تۇرعىندار تىرشىلىك ءنارىن وزدەرى قازعان قۇدىقتان الادى. الايدا ولار سۋدى جۋىنۋعا بولماسا، ىشۋگە، اس ازىرلەۋگە جارامسىز ەكەنىن ايتىپ وتىر.

ۆاگي مۇحاممەد، جەرگىلىكتى تۇرعىن:

- ءبىز بيلىكتىڭ قولىنان كەلمەيتىن زاتتى سۇراپ وتىرعان جوقپىز عوي. ءبىز اۋىز سۋعا ءزارۋمىز. بۇعان دەيىن تالاي مارتە جەرگىلىكتى بيلىككە تالاپتارىمىزدى ايتقان بولاتىنبىز. ولار جۋىق ارادا بۇل ماسەلەنى شەشىپ بەرەمىز دەپ ۋادە ەتكەنىمەن، ەش ناتيجە جوق.

بۇگىندە سۋ تاپشىلىعىنان داكاحليا پروۆينتسياسىنداعى تاعى ءبىر ەلدى مەكەن جاپا شەگىپ وتىر. ەل حافەر شەباب اۋىلىنداعى فەرمەرلەر قۋاڭشىلىق كەسىرىنەن تاۋىپ جۇرگەن ءناپاقاسىنان ايرىلىپ وتىرعاندارىن ايتىپ قىنجىلۋدا.

مۇحاممەد حاسان، فەرمەر:

- ءبىز قازىر ەگىس القاپتارىن سۋارا الماي وتىرمىز. مۇندا تۇرىپ جاتقانىما 40 جىلدىڭ ءجۇزى بولدى. الايدا مىناداي الاپات قۇرعاقشىلىقتى العاش كورۋىم. قازىر ايماقتىڭ اۋىل شارۋاشىلىعى قيىن كەزەڭدى باستان كەشىرىپ جاتىر.

مۇحاممەد شابان، فەرمەر:

- مەن ەگىس القاپتارىن سۋاراتىن ماشينادا جۇمىس ىستەيمىن دەپ قولىمنان ايىرىلدىم. سونشاما ازاپتى كورىپ قينالعانداعى كۇنىمىز مىناۋ. جەرىمىزدىڭ كوپ بولىگى قۋراپ قالعان. بۇگىندە نە قولىم دا جوق، نە ەگىستى القابىمىز دا جوق. ەندى بولاشاعىمىز نە بولماق؟!

سۋعا ءزارۋ بولعان جەرگىلىكتى حالىق بۇل جاعدايدى «ەفيوپيانىڭ قايتا وركەندەۋىنىڭ ۇلى دامباسى» جوباسىمەن بايلانىستىپ وتىر. سۋدانمەن اراداعى شەكاراعا جاقىن ورنالاسقان نىساننىڭ قۇرىلىسى 2011 -جىلى باستالعان بولاتىن. مىسىرلىقتار «ءنىل وزەنىندەگى سۋ دەڭگەيىنىڭ تومەندەۋىنە سونىڭ كەسىرى ءتيدى» دەپ وتىر.

حاني دابيس، سۋ رەسۋرستارى مينيسترلىگىنىڭ وكىلى:

- بۇل جاعدايعا ەفيوپنيانىڭ قايتا وركەندەۋىنىڭ ۇلى دامباسىنىڭ قاتىسى جوق. ول كليماتتىڭ وزگەرۋى كەسىرىنەن تۋىنداعان ماسەلە. بۇل سوڭعى 103 جىل ىشىندەگى ەڭ الاپات قۇرعاقشىلىق. ول ازداي، شارۋا قوجالارى سۋدى كوپ تالاپ ەتەتىن كۇرىش سەكىلدى داقىلداردى وسىرەدى. بۇل دا جاعدايدى ءورشىتىپ وتىرعانى ءسوزسىز.

جالپى حالىق سانىنىڭ وسۋىنە بايلانىستى 2025 -جىلعا دەيىن مىسىرلىقتار اراسىندا سۋدى تۇتىنۋ مولشەرى ەكى ەسەگە ارتۋى مۇمكىن. ساراپشىلار وسىلاي دەپ توپشىلاپ وتىر. سوندىقتان 9  جىلدان كەيىن ەلدەگى ەگىس القاپتارىنىڭ %60 ى كۇيىپ كەتۋى عاجاپ ەمەس

www.24.kz