قىتايدا بورىشكەرلەردى ماسقارالاۋدىڭ جاڭا ءتاسىلى پايدا بولدى

استانا. قازاقپارات - قىتاي بيلىگى بانكتەرگە باتپانداپ قارىز بولعان بورىشكەرلەردىڭ سۋرەتتەرى مەن جەكە مالىمەتتەرىن قوعامدىق ورىنداعى ۇلكەن ەكرانعا شىعارىپ، جارياعا جار سالىپ جاتىر. وسىلايشا، شەنەۋنىكتەر تولەنبەگەن نەسيەلەردى قايتارۋدىڭ جاڭا ءتاسىلىن قولعا الدى. شاڭحايدىڭ ورتالىق ۆوكزالىنداعى پويىزداردىڭ كەلىپ- كەتەتىن ۋاقىتىن كورسەتەتىن ۇلكەن ەلەكتروندى تابلو ەندى جاڭا قىزمەت ءتۇرىن دە اتقاراتىن بولدى.

اقپاراتتىق الىپ تاقتادا بانكتەن العان اقشاسىن قايتارماي جۇرگەن بورىشكەرلەردىڭ اتى-ءجونى جازىلا باستادى. ەلدەگى ەكونوميكالىق قۇلدىراۋ بەرەشەگىن وتەي المايتىن جەكە تۇلعالار مەن كومپانيالاردىڭ قاراسىن مولايتتى. رەسمي مالىمەت بويىنشا، مامىردىڭ سوڭىندا قايتارىلماعان قارىز سوماسى 300 ميلليارد دوللارعا جەتكەن. ءبىراق ساراپشىلار ناقتى بەرەشەك كولەمى بۇدان الدەقايدا كوپ دەيدى. كەسىمدى مەرزىمى وتسە دە، نەسيەسىن وتەۋگە اسىقپاعان ازاماتتاردىڭ ار- ۇياتىن وياتۋ ءۇشىن قىتاي سوتتارى ولاردىڭ سۋرەتىن، قۇجات ءنومىرىن، مەكەن جايى مەن بەرەشەك سوماسىن ەل- جۇرتقا اشىق كورسەتۋ تۋرالى شەشىم قابىلداعان. تولەمىن كەشىكتىرگەن 20 بورىشكەر مەن كومپانيا باسشىلارى تۋرالى اقپارات مونيتوردا ءار 10 مينۋت سايىن كورسەتىلەدى.

سۋ، جولاۋشى:

- مەنىڭشە، بۇل دۇرىس ءتاسىل. بورىشكەرلەردى وسىلاي ماسقارالاۋ كەرەك. سەبەبى ولاردىڭ پيعىلى ارام ەكەنى اڭعارىلىپ تۇر. وسى ابەس ارەكەتى ءۇشىن سازايىن تارتۋى ءتيىس.

ءبىراق بيلىكتىڭ بۇل قادامىن ادامنىڭ جەكە ومىرىنە قول سۇعۋ دەپ سانايتىندار دا از ەمەس.

لي يۋن جولاۋشى:

- تولىق اتى-ءجونىن، قۇپيا مالىمەتتەردى جايىپ سالۋ، سۋرەتىن جاريالاۋ جەكە ومىرگە قۇرمەتسىزدىكپەن قاراۋدىڭ بەلگىسى. ماسەلەنى شەشۋدە سوتتاردىڭ باسقا ءتاسىل ىزدەگەنى ءجون. بۇل ۋاقىتشا شارا دەپ ەسەپتەيمىن. الداعى ۋاقىتتا اقىلعا سيارلىق امال تابىلار. بەيجىڭدەگى ادۆوكاتتىق كەڭسەنىڭ باسشىسى نيك تان بورىشكەرلەر قوعامدىق ەرەجەنى سانالى تۇردە بۇزىپ وتىر، سوندىقتان ولاردىڭ جەكە ومىرىنە ارالاسۋدىڭ ەش سوكەتتىگى جوق دەگەن پىكىردە.

نيك تاڭ، ادۆوكاتتىق كەڭسە باسشىسى:

- بىرىنشىدەن، ولار زاڭدى بۇزىپ، وزدەرى باسىنا بالە تىلەپ الدى. قوعام ولاردىڭ شىنايى بەت- بەينەسىن، ادامي بولمىسىن تانىپ- ءبىلۋى كەرەك. سوندا ولارمەن ءارى قاراي بيزنەس جۇرگىزۋدە ساق بولۋدى قاپەرگە سالادى. بۇل ءبىر جاعىنان ورىندى ەسكەرتۋ ىسپەتتى.

تابلو ارقىلى جاھانعا جاريا ەتىلىپ، ماسقارا بولعاندار دەرەۋ تەلەفون ءنومىرى مەن مەكەن- جايلارىن وزگەرتىپ، ءتىپتى كەيبىرى قاراسىن باتىرا باستاپتى. بيلىك بەرەشەگىن بەرمەي، بەزىنىپ جۇرگەندەردى ىزدەپ-تابۋعا ەلدەن كومەك كورسەتۋدى سۇراۋدا. الايدا بۇل ءوتىنىش ازىرگە ناتيجە بەرە قويعان جوق. ويتكەنى، ەل الدىندا ءجۇزى قارا بولسا دا، قارىزىن قايتارماي قاشىپ جۇرگەندەر، قاراسىن كورسەتۋگە اسىعار ەمەس.

www.24.kz