قازاقستاندىق جازۋشىمەن ءانشى گۇلبارشىن تەرگەۋبەكوۆا شاڭىراق كوتەردى
بۇل تۋرالى Stan.kz حابارلايدى.
ونەر الەمىنىڭ قوس جۇلدىزى شاڭىراق كوتەردى. وسى ۋاقىتقا دەيىن جازۋشى ءارى اقىن ءديدار امانتاي الەۋمەتتىك جەلىدەگى پاراقشاسىندا جەرلەسى گۇلبارشىن تەرگەۋبەكوۆاعا ماحاببات جىرىن ارناعان بولاتىن. ءداستۇرلى ءانشىنىڭ تۋعان كۇنىنە ارنالعان ولەڭ تومەندەگىدەي:
«ۇشىپ كەلە جاتىرمىن كوكتى ءتىلىپ ۇشاقتا،
كورمەگەلى قالقانى بولعان ەدى ءۇش اپتا،
قۇشاقتاسام سەنى ەگەر باسىپ- باسىپ كەۋدەمە،
سەن دە مەنى جىبەرمەي قاتتى- قاتتى قۇشاقتا!
قۋاناسىڭ بالاسىن جولدان كۇتكەن اناداي،
كوزدەرىڭدى ساعىندىم جارقىراعان تاناداي،
جانارىڭا جارتى الەم سىيعان ءمولدىر تۇنىق كوز
ون سەگىز مىڭ عالامدى ويعا تۇتقان ساناداي.
قاباعىمەن شەشەدى ەر- ازامات جانجالىن،
قازاعىما قازىبەك، ءمادي بەرگەن شانشارىم،
جالعان ءسوزدى جاراتپاي جارىپ تاستار قانجارىم!
ات بايلايتىن... جان جارىم!
قيادى ەكەن باسقاعا قىزىق- دۋمان شاقتى كىم،
ماعان عانا ارناعان بار عۇمىرىن، ۋاقىتىن،
ناق سۇيەرىم - تاعدىردىڭ ماڭدايىما جازعانى،
ناعىز ەرىن تانىعان ناعىز مەنىڭ باقىتىم!
بۇل ولەڭدى اقىن 2016 -جىلدىڭ 28 -قاڭتارىندا جازعان- دى. ارتىنشا ءديدار امانتاي پاراقشاسىنا گۇلبارشىن تەرگەۋبەكوۆانىڭ سۋرەتىن سالىپ، تۇسىنا دميتري ماليكوۆتىڭ «كتو تەبە سكازال؟» ءانىن جازىپ قويعان. دەسە دە، ەكى ونەرپاز قارىم- قاتىناستارى تۋرالى وسى كۇنگە دەيىن ەشنارسە اشىپ ايتپاعان. ەندى مىنە قوس عاشىق شاڭىراق كوتەرىپ، وتباسىن قۇرۋدى ءجون كورگەن.
بۇل جاڭالىقتى ەستىگەن ءانشىنىڭ ارىپتەستەرى قاتتى تاڭ قالعان. سەبەبى، ولار كۇيەۋ جىگىتتىڭ كىم ەكەنىنەن بەيحابار ەكەن. «گۇلبارشىن جانىم، باقىتتى بول! بارعان جەرىڭدە باعىڭ اشىلسىن! ءبىراق قايدا شىققان ەكەن؟» - دەيدى شاحيزادا استانا ارناسىنىڭ «ەل اۋزىندا» باعدارلاماسىنىڭ جۋرناليستەرىنە.
گۇلبارشىن تەرگەۋبەكوۆا مەن ءديدار امانتاي دا قاراعاندى وبلىسىنىڭ قارقارالى اۋدانىندا دۇنيەگە كەلگەن. ءداستۇرلى ءانشى ۇزاق جىلدان بەرى ەكى بالاسىن جالعىز ءوزى تاربيەلەپ كەلەدى. ول وتاندىق باعدارلامالاردىڭ بىرىندە باسىنىڭ بوس ەكەنىن ايتقان بولاتىن. ارىپتەستەرى عاشىقتاردى قۇتتىقتاپ قانا قويماي، تويعا شاقىرۋ كۇتەتىندەرىن جەتكىزدى.
