الماتى پوليتسيا قىزمەتكەرلەرى ءبىر كۇندىك ەڭبەكاقىسىن وققا ۇشقان ارىپتەستەرىنىڭ وتباسىنا اۋدارادى

الماتى. قازاقپارات - الماتى گارنيزونىنىڭ پوليتسيا قىزمەتكەرلەرى رۋسلان كۇلەكبايەۆتىڭ زاڭعا قايشى ارەكەتىنەن قازا تاپقان ارىپتەستەرىنىڭ وتباسىنا ءبىر كۇندىك ەڭبەكاقىلارىن اۋدارادى.

«ق ر «قۇقىق قورعاۋ قىزمەتى تۋرالى» زاڭنىڭ 66-بابىندا قىزمەتكەرلەر قايتىس بولعان جاعدايداعى كەپىلدىكتەر قاراستىرىلعان. وسىلايشا، ءتارتىپ ساقشىسى ءوز مىندەتىن ورىنداۋدا مەرت بولسا نەمەسە قىزمەتتىك مىندەتىن ورىنداۋدا جاراقات الىپ، جۇمىستان شىعۋعا تۋرا كەلسە، اسىراۋشىسىنا نەمەسە مۇراگەرىنە سوڭعى لاۋازىمىنداعى جالاقىنىڭ التى ايلىق مولشەرى كولەمىندە ءبىرجولعى وتەماقى تولەنەدى. جانە قر «قۇقىق قورعاۋ قىزمەتى تۋرالى» زاڭنىڭ 67-بابىندا ءوز مىندەتىن ورىنداۋدا قازا تاپقان قىزمەتكەردى جەرلەۋ شىعىندارىنا دا وتەماقى قاراستىرىلعان. بۇل جاعدايدا ءۇش ايلىق جالاقى كولەمىندەگى وتەماقى، ال زەينەتكەرلەرگە - ءۇش ايلىق زەينەتاقى كولەمىندەگى وتەماقى تولەنەدى»، - دەپ حابارلادى الماتى ءى ءى د رەسمي وكىلى، پوليتسيا مايورى سالتانات ازىربەك.

وققا ۇشقان پوليتسيا قىزمەتكەرلەرى تۋرالى اقپارات:

- پوليتسيا كاپيتانى نۇرماحانبەتوۆ باۋىرجان مالىك ۇلى، ءى د ءا پ ب جول- پاترۋلدىك پوليتسياسىنىڭ قاۋىپسىزدىك قىزمەتىنىڭ اعا ينسپەكتورى، 28.03.1988 ج. ت. ىشكى ىستەر ورگاندارىندا 22.12.2011 جىلدان بەرى جۇمىس ىستەگەن. وتباسىلىق جاعدايى: ۇيلەنگەن، ءبىر قىزى بار.

- كىشى پوليتسيا سەرجانتى سالىمبايەۆ ماقسات قولعانات ۇلى، ءى ءى د ج پ ق ج پ پ پولكىنىڭ پوليتسەيى، 02.11.1991 ج. ت. ىشكى ىستەر ورگاندارىندا 15.11.2013 -جىلدان بەرى ەڭبەك ەتكەن. وتباسىلىق جاعدايى: ۇيلەنگەن، ءبىر قىزى بار.

 - پوليتسيا ستارشيناسى عاليەۆ ايان ەربولعان ۇلى، الماتى قالالىق م ك ق ب م م پوليتسياسى 2- باتالون پوليتسەيى، 18.04.1974 ج. ت. ىشكى ىستەر ورگاندارىندا 30.01.1997 -جىلدان بەرى جۇمىس ىستەگەن. وتباسىلىق جاعدايى: ۇيلەنگەن، ەكى قىزى بار.