اۋىلداعى قازاق ايەلدەرىنە بيزنەس جوبا باستاۋعا كومەك كورسەتىلۋدە

استانا. قازاقپارات - ەكونوميكانى سۇلۋلىق قۇتقارادى. «نۇر وتان» پارتياسى جانىنداعى «ايەلدەرگە قولداۋ» ەكسپەرتتىك توبى وسى قاعيداعا سەنەدى.

سەبەبى ولار بىرنەشە قوعامدىق قورمەن بىرلەسىپ، ءۇش جىلدان بەرى اۋىلداعى ايەلدەرگە بيزنەس جوباسىن باستاۋعا كومەكتەسىپ كەلەدى. وسى جولى ەكسپەرتتىك توپ اقمولا وبلىسىنداعى اقمول اۋىلىنا كەلدى. جۇمىسسىز وتىرعان جانە ءوزىن- ءوزى جۇمىسپەن قامتىعان ايەلدەرمەن كەزدەسىپ، سەمينار-ترەنينگ وتكىزدى. ءۇش جىلدا 5 مىڭ ازاماتشا بيزنەستىڭ قىر-سىرىن ۇيرەنىپ، 21 ى ارنايى گرانتقا يە بولعان. بيىل تاعى 10 گرانت ۇزدىك بيزنەس- جوبانىڭ يەسىنە تابىستالادى. بۇل شامامەن 1 ميلليون 200 مىڭ تەڭگە. ۇيىمداستىرۋشىلار جاسىل تەحنولوگيالاردى قولدانا وتىرىپ، ءوز ىستەرىن اۋىل- ايماقتاردا باستاعىسى كەلەتىن ازاماتشالارعا دەن قويىپ وتىر.

مايرا ايسينا، ق ر پارلامەنتى ءماجىلىسىنىڭ دەپۋتاتى:

- ەكسپو- عا شامامەن 5 ملن ادام كەلەدى. ونىڭ 1 ميلليون شەتەلدىك ازاماتتار بولسا، قالعان 4 ميلليون ءوزىمىزدىڭ ەلدىڭ ادامدارى. دەگەنمەن ولاردى تاماقتاندىرۋ كەرەك، ولاردى كۇتۋ كەرەك جانە كەلگەن شەتەلدىك ادامدار كىشكەنە قالتاسىنا اقشا سالىپ كەلەدى عوي قازاقستاننان بىردەنە الا كەتسەك دەگەندەي. سۋۆەنيرنىي پرودۋكسيا (كادەسىي ونىمدەرى) دەيمىز. ءبىر جاعىنان ءبىزدىڭ داستۇرلەرىمىزدى كورسەتۋىمىز كەرەك. سونىڭ ءبارىن كىم كورسەتە الادى؟ اۋىلدىڭ ايەلدەرى. ۇيدە وتىرعان ايەلدەردىڭ قولدارىنان ءبارى كەلەدى.

www.24.kz