الماتىداعى اتىستا قازا تاپقان ايان عاليەۆتىڭ ارتىندا ەكى بالاسى قالدى
بۇل تۋرالى ونىڭ تۋعان جەڭگەسى ءمالىم ەتتى.
قازىرگى ساتتە الماتى قالالىق جەدەل شۇعىل كومەك كورسەتۋ اۋرۋحاناسى باسشىلىعى سودىرلار قولىنان زارداپ شەككەندەر جايىندا ازىرگە ەشقانداي تۇسىنىكتەمە بەرگەن جوق. جۋرناليستەر بىرنەشە ساعاتتان بەرى رەسمي اقپارات كۇتىپ سىرتتا سابىلىپ وتىر. دارىگەرلەردىڭ ايتۋىنشا، ءالى وپەراتسيالار جۇرگىزىلىپ جاتىر. اۋرۋحانا الدىندا ادامدار كوپ. سولاردىڭ ىشىنەن سىرتقا جىلاپ شىققان ءبىر ايەلدى جۋرناليستەر كوڭىلىن سۇراپ، اڭگىمەگە تارتىپ ەدى، اتىس بارىسىندا اۋىر جاراقات الىپ، قازا تاپقان ق ر ءى ءى م «كۇزەت» مامانداندىرىلعان كۇزەت قىزمەتى باسقارماسىنىڭ قىزمەتكەرى 42 جاستاعى ايان عاليەۆتىڭ تۋعان جەڭگەسى بولىپ شىقتى. جۋرناليستەر وعان كوڭىل ايتتى.
جەڭگەسىنىڭ ايتۋىنشا، ايان ابىلاي حان داڭعىلى مەن تولە ءبي كوشەسى ماڭىندا ورنالاسقان المالى اۋدانى بويىنشا مەملەكەتتىك كىرىستەر دەپارتامەنتىندە كۇزەتتە بولعان ەكەن.
«ول پوستا تۇرعان. ءبىر ۋاقىتتا ادامدار «سىرتتا اتىس بولىپ جاتىر» دەپ جۇگىرىپ كەلىپتى. سول ارادا ايان سىرتقا جۇگىرىپ شىعادى. تاپانشاسىن قولىنا الام دەگەنشە سودىر وعان قاراي وق جاۋدىرىپتى. ءبىراق، ايان قۇلاپ جاتىپ، سودىردى اتىپ ولتىرگەن. ءوزىنىڭ بەس نەمەسە التى جەرىنەن وق تيگەن. ول اۋرۋحاناعا جەتپەي جولدا كوز جۇمدى. ەندى ونىڭ وتباسىن كىم اسىرايدى؟!»، - دەپ جىلادى اياننىڭ جەڭگەسى مارجان.
ونىڭ ايتۋىنشا، اياننىڭ ارتىندا ايەلى، ءۇشىنشى سىنىپتا وقيتىن قىزى جانە جەتى ايلىق ۇلى قالدى. ونىڭ ۇستىنە قولىندا 85 جاستاعى اناسى بار ەكەن.
ايان عاليەۆ 1974-جىلى الماتى وبلىسىنىڭ سارقانت اۋدانىنىڭ باقالى اۋىلىندا تۋعان.
اۆتور: ايبوتا جاپپاربەرگەن
