17:29, 18 - شىلدە 2016 | GMT +6
قاۋىپسىزدىك كەڭەسىنىڭ وتىرىسىندا الماتىداعى جاعداي بويىنشا شەشىم قابىلدانادى - كارىم ءماسىموۆ
استانا. قازاقپارات - قاۋىپسىزدىك كەڭەسىنىڭ جەدەل وتىرىسىندا الماتىداعى جاعداي بويىنشا شەشىم قابىلدانادى.
بۇل تۋرالى ق ر پرەمەر-ءمينيسترى كارىم ءماسىموۆ تۋيتتەردەگى اككاۋنتىندا جازدى.
«مەملەكەت باسشىسىنىڭ قاتىسۋىمەن وتەتىن قاۋىپسىزدىك كەڭەسىنىڭ جەدەل وتىرىسىنا بارا جاتىرمىن. الماتىداعى جاعداي بويىنشا شەشىم قابىلدانادى»، دەلىنگەن جازبادا.
ەسكە سالا كەتسەك، بۇگىن بەلگىسىز بىرەۋلەر الماتىنىڭ بىرنەشە اۋدانىندا وق اتقان - قازىر قالادا ۇ ق ك د عيماراتى، ابىلايحان كوشەسى تولىعىمەن جانە اباي داڭعىلى قورشاۋعا الىندى.
قارۋلى قاقتىعىس ناتيجەسىندە 7 پوليتسيا قىزمەتكەرى اۋرۋحاناعا ءتۇستى. وكىنىشكە قاراي، وسى اتىس سالدارىنان ءبىر بەيبىت تۇرعىن مەن ءۇش پوليتسيا قىزمەتكەرى قازا تاپقانى حابارلانىپ وتىر.
شابۋىلشىلاردىڭ ءبىرى دەرەۋ قۇرىقتالدى، ەكىنشىسى كەيىنىرەك ۇستالدى. سونداي-اق الماتى قالاسىنىڭ اۋماعىندا تەرروريستىك قاۋىپتىلىكتىڭ «قىزىل» دەڭگەيى بەلگىلەندى.
