ەلشى تۇركيانى قارالاپ جاتقان اقپاراتتارعا سەنبەۋگە شاقىردى

استانا. قازاقپارات - بۇل تۋرالى تۇركيانىڭ قازاقستانداعى توتەنشە جانە وكىلەتتى ەلشىسى نەۆزات ۋيانىك قازاقستاندىقتاردى تۇركياداعى بۇلىكتى ەردوعاننىڭ ءوزى ۇيىمداستىرعان بولۋى ىقتيمال دەگەن «قارا ۇگىتكە» سەنبەۋگە شاقىردى.

«بۇل لاڭكەستىك ۇيىمنىڭ الەمدە كەڭ قۇرىلىمى بار. وكىنىشكە وراي، ولاردا «تەرىس ۇگىت- ناسيحات» جاساۋعا جانە قوعام پىكىرىنە ىقپال ەتۋگە قابىلەتتەرى بار. (...) باۋىرلاس جانە دوس مەملەكەتتەرگە كەلەتىن بولساق، قازاقستان جانە قازاقستان حالقى ءبىزدىڭ ەلگە قاتىستى ايتىلىپ جاتقان مۇنداي «قارا پروپاگاندالارعا» سەنبەيدى دەپ ۇمىتتەنەمىز»، - دەدى ەلشى بۇگىن استانادا وتكەن باسپا ءسوز ءماسليحاتىندا.

«بۇلىك بارىسىندا ءبىزدىڭ ەلدىڭ پرەزيدەنتى جاتقان قوناق ءۇي دە بومبىلاندى. بومبىلار پارلامەنتكە جانە باسقا دا ۇكىمەتتىك عيماراتتارعا تاستالدى. (...) قازىرگى ۋاقىتقا دەيىن وسىنداي «قارا ۇگىت- ناسيحاتتار» تىيىلماي، ءبىزدىڭ ەلدى قارالايتىن وقيعانىڭ جاڭا نۇسقالارى ايتىلىپ جاتىر»، - دەدى ن. ۋيانىك.

ايتا كەتەيىك، 15 -شىلدە كۇنى ستامبۇلدا اسكەري بۇلىك ورىن الىپ، 190 نان استام بەيبىت ازامات قازا تاپتى، 1400 دەن استام ادام جارالاندى. قازىرگى ۋاقىتتا 6 مىڭنان استام بۇلىكشى ۇستالدى، توڭكەرىس بارىسىندا 100 گە جۋىق بۇلىكشى ءولتىرىلدى.

 اۆتور: جاسۇلان جولدىبايەۆ